باخچێوە بېگەرد
نویستەی: میرزا ئۆلقاڎر و پاوەی
بەشۍ: شەسس و یەکەمە

عەبدوڵڵا بە شازادۍ شامی گوفتش نەڎا، چونکوم واتش من وېم خاوەنو قەراری نېیەنا، بەڵکوم تاتەم (عەبدولموتەلیب) کە دەسەڵاتدارو قوڕەیشیەن، ئاڎ دماڕۊ من دیاریکەرۊن، ئیتر پەی لاو (ئامینۍ) ژەنېش گېڵاوە، ئا شەوە پېسە (شەمع و پەروانە)ی، پېسە (گوڵ و بولبوڵ)ی ئاوېزانو یۊترینی بیۍ، نوور و محەمەڎی جە ڕۊخسارو (عەبدوڵڵا)یۆ لوانە دلۍ لەمەو (ئامینۍ):
ئېڎ وات و، خېزا، چوون سەوڵی ئاوا
سواربیی، وە ئەسپ، وە مەنزڵ، یاوا
پەیا پەی، دەرلاو، سلاح کەند جەوەر
ڕوو کەرد، وە مەنزڵ، ئاینەی ئەنوەر
یەکێ پەروانە، یەکێ شوعلەی شەم
چوون گوڵ و بولبول، داخل بین وە هەم
ئەو شەو وە مەیلان، بینای بېئەندېش
نووری محەمەد، یاوا، وەلای وېش
بەرشیی، نە جەبهەی ئەو عالی نەسەب
کەفت ئەو بەتن پاک، ئامینەی وەهەب
دەرلا، زیاڎ بیی، حوسن و جەماڵش
یاوا، بە ئەفلاک، پایەی ئېقباڵش
عالەم گرد، تەمام، بی سەناخوانش
موتېعی فەرمان، ئەمری فەرمانش
عەبدولموتەلیب مەشیی وە ماڵش
پەی پەی مەپەرسا، حاڵ و ئەحواڵش
بەعد عەبدوڵڵا سوجدە پدەر بەرد
قېسەی مەلیکە، شامی، عەرزشکەرد
عەبدولموتەلیب، بەبۍچوون و چەند
وات: ئەو تەقدیریش، کەردەن خوڎاوەند
باعېس، نمەبۊم، عەیبێ نەدارۊ
بشۊ بوینیش، جە نۊ، هەم ئارۊ
[1]