شیرین زۊحاکەن شیرین زۊحاکەن
مارانت چون مار دۊش زۊحاکەن
سەودای دەیجووری حوسنت جەلاکەن
«لا تَخف» نە خەوف مەحشەر بەرپا کەن
نازۆکی ئەبرۊش ئایەی «لافتا»ن
مەرسای قەوس سەیف بوڵەند هێممەتان
دیدە، دیدەی جەیر نەخۆتەن چەردە
نگا چوون شاباز شکاران کەردە
شاماران دوو تیپ سپای شەر ئەنگېز
سەر باڵ شەمقاڕ قەزاجوی تۆندخېز
بینی نەقش کێلک ئوستاد قەدیم
پەی زینەت کەردەن سیبێ وە دوونیم
باڵ دەورسیب سیم سادەی خاس
حەی وچان پێوە بیەن ورەقاس
بە شنۊی نەسیم زومرەی حەی تاران
هوجووم ماوەرو، وەپای شاماران
گا، مشیان وەسەر سەرچەشمەی زەمزەم
گا حەڵقە مەدان نە حەواڵی دەم
دەم غونچەی نازک، ڕەوزەی ڕزوانی
کەیلەن جە لۆلۆی، یاقووت کانی
دەندان دوڕدانە نە پەنای یاقووت
گەنجینەن یا دەم، یاقووتەن یاقووت
بۊی نەفەس نەسیم عیسای ڕۆحانی
ئەحیا کەرۆ جێسم سەد ساڵەی فانی
شەفەتەین، شفای دەرد بیماران
مەرهەم پەرێ زام خاتر ز گاران
خاڵێ جاگېرتەن نە حەواڵی دەم
چوون هێندوو بەچە، نە دەور زەمزەم
ئەو خاڵە باعېس شین بۍ شۊمەن
وەسواسەی شەوان پەژارەی ڕۊمەن
هەر ئەو خاڵە بۍ، قەیس بەرد وەسەحرا
سەنعانش کېشا، وەڕای کلیسا
بۆی ئەو خاڵە بۍ، وەشیر و یاوا
لاحەیا سینەی خۆسرەو شکاوا
تۆپەی زنج نە تەرح شەمامەی تڵا
تڵای تازە قاڵ خاسەی پەڕ جەلا
پێوە مەدرۆشۆ زنج و سیم و زەر
مەر شەوقێ کۆی نوور جۆقەی شای قەجەر
گەردەن چون گرە، میل جە مۆغاران
سەلەج سەیقەل ساف، سادەی کۆساران
سیما و سینە و باڵ باهووی جەیر و مەم
چون چل چراخان شەوق مدۆ وەهەم
ناف، تەجربەی دەس، حەکاکی قەدیم
قتووی مەعجوونات ئەرەستووی حەکیم
وەلحاسڵ نە فەرق تا کەعبەی ڕەجلەین
عەیب تێدا نیەن و گەردەنم دەین
یاڕەب بە حاجەت شای بوراق سوار
شیرین مەحفووز کەی جە دیدەی بەدکار
هەرکەس جامێ مەی نەودەم بنۆشۆ
خزر ئاسا، بەرگ ئەحیا بپۆشۆ
«ئەحمەد» تا زیندەن هەر دوعا گووشەن
مەدهوش شەماڵ عەتر گیسووشەن
#ئەحمەد بەگی کۆماسی# [1]