ساقی سادەی شی وەهار ئاماوە
گوڵان سەرکێشان نە تۊی سەحراوە
هەوای دڵگوشاد ئەردی بەهەشتەن
فەروەروی سەحرای گەرمەسێر وەشتەن
وادەی بادەی ناب سەیری وەهارەن
سەر زەمین مەزهەر لەقای دڵدارەن
زەمزەمەی مەزاق دڵ ئەفگارانەن
سەدای تەپڵی تیپ دەردەدارانەن
وەقتی نۊشاونۊش سەبووی قەرقەفەن
دەنگی زەلەی زیل دائیرە و دەفەن
درەختەن سەوزەن شنۊی شەتاوەن
نۊرۊزەن سەوزەن هەوای پای کاوەن
مەیەن مەعشووقەن موحبەتەن مەیلەن
خەمان لەبریزەن پیاڵان کەیلەن
شەڕەن شۆڕشەن غەوغان غەریېوەن
مەر جلوەی جەمال دڵان فریېوەن
نە گشت دیارێ تەجەلای توورەن
فیتنەی گیرودار قەتڵی مەنسوورەن
فنا في اللهان مەست دڵەفگا
بێباک مەواچان إنّي أنا الله
ڕەندانی سەرمەست جان فیدای جانان
أنا الحَق چوون زیکر زاهید مەوانان
بۊ تاکو بگێڕین خەسرەوی بەزمێ
چەنی هەستییە بکەرین ڕەزمێ
بەزمی چوون مەجلیس بەهمەن وەکام بۊ
گا حەدیسی جەم گا باسی جام بۊ
گا گۊش نە سەدای چەقانە و چەنگ بۊ
چەم نە تەماشای ساقیی گوڵ ڕەنگ بۊ
ئەی ساقی دەخیل من وەی زامەوە
ئیلتیفاتۍ کەر! بۊ وە لامەوە!
عیلاجێ پێم دەر سوودەمەندم بۊ
باعیسی حەیات قەیدی بەندم بۊ
ڕەستگارم کە لەی بەند و دامە
قەدەم ڕەنجان کەر! وەعدەم تەمامە
تەشریف باوەرە وەو سەبووتەوە
وەو پیاڵەی گوڵ ڕەنگ چوون یاقووتەوە
وەو سینەی سیمین زەرفی زەڕەوە
وەو جامی گوڵ فام بۊی عەنبەرەوە
هەر کەس بگێڵۆ جا مۍ پەی کامێ
دەرمان پەی ئێشی هەر دەرد و زامێ
موتریب تۊیش وە چەنگ دڵنەوازەوە
وەو سۊزی سەمتوور سەدای سازەوە
وەو موزیقەی مەشق سەد قانوونەوە
دەم وە سەدای ساز ئەرغەنوونەوە
مەرباچان مەلایش نە هەستی هویش ڕەست
بی وە کاسە لێس مەستانی ئەلەست
#مەلای جەباری# [1]