باوەر بە تەقریر ئیقلیم شەشەم
موڵک جە سیمەن پڕ زەرع و حەشەم
ئەو ئیقلیم و جا جە «بين العوام»
مەشهوورەن بە ئیسم سەفینەی نیزام
یەک شەهر عەزیم ئیسمش ئەمەلەن
مەعموورەش بە زەرع شەڕ موستەعمەلەن
کیزب، نەمیمی، حیرس، شەغەب و تەعەب
ئەفسوون و حیلە، ڕیا و لەهوو لەعب
حیقد و تەمەع و سیمعەت «خِلا»
شوحح و دەنائەت، هەم عوجب و هەوا
قەزا قەسەبەن پڕ زەرع و سەمەر
بەو شەهر ئەمەل مولحەقەن یەکسەر
نەفس ئەممارە نەوجا سوڵتانەن
ساحێب تەخت و تاج نوتق و فەرمانەن
غورووریش کەردەن بە سەر قۆرەنا
غەفڵەت بە ئەحکام ڕەئیس جەزا
جولووسەن نە تەخت ئەمەل شەهەنشا
غەیبەتەن یاوەر شای حیشمەت پەنا
یا حەق! غەیر جە تۆ نەداروون چارە
حیفزم کەر نە شەڕ نەفس ئەممارە
هەرچەند جە ئیقلیم شەشەم ئەسیرم
عاسی و پڕ گوناﮪ، بەستەی زنجیرم
بە ئەڵتاف وێت حەیی جیهاندار
عەفوم کەر جە زەنب ئیقلیم چەهار
هەم بە فەزڵ وێت دانای پڕ کەرەم
سەر ئازادم کەر جە بەند شەشەم
«فەقێ» دڵ نەی موڵک شەشەم بی ئیسبات
بەر موحەممەد بۆ هەردەم تەحییات
#فەقێ قادری هەمەوەند# [1]