باخچێوە بېگەرد
نویستەی: میرزا ئۆلقاڎرو پاوەی
بەشۍ سەڎ و دەهەمە
سەحەر زوو، ئەهلو کاروانەکەی یانەو (بەخېرا)یشان جیائاست، بەڵام بەخېرا، بە ئیشارەتو چەمی، ئەبوتالیبش یاونانە کە پەلەنەکەرۊ، پەوکەی چەنی محەمەدی جیێ مەنۍ و ڕاهیبەکەیچ(بەخېرا)، ڕوەش کەردە ئەبوتالبی، ماچۊ:
جە دمای نەهار، ئاخېز کەردشان
گرد وە لای، ئەموال، تەشریف بەردشان
بە ئیشارەی ئەو شەخسی، پاک نەزەر
مەند ئەبوتالیب، چەنی، ئەو سەروەر
ڕاهیب، چوون مەیلش، تەمام بیی ڕاغیب
ڕووی خیتابش کەرد، وە ئەبوتالیب
واتش: ئەی جوان، ڕیشە دڵکېشەن
داخۊ چەنی تۊ، نەسیبش چېشەن
ئەبو تالیب وات: بە من فەرزەندەن
ئەی جیسم بەندەن، هەر بە ئەو بەندەن
ڕاهیب وات: وەڵڵا موشکیل کەر ئاسان
من جە تۊ خاستەر، ئەوم شناسان
چوون دایەو بابۊش ئەر کۊی سەفا بان
مەبۊ، هەردوو فەوت، زومرەی ئەموات بان
ئەبوتالیب وات: خوداوەند دادەن
محەمەد بە من، برادەر زادەن
ڕاهیب وات: سەددەق فەرموودەت ڕاسەن
حەرفی دووبارەت، بۍ کەم و کاسەن
ڕوو کەرد وە خدمەت، شای خەیرولبەشەر
پەرێ ئیمتیحان، ئەیقانێ خەبەر
وات: ئەی محەمەد شای سەعادەتمەند
بە (لات) و (عوززا)، مەدەرووت سەوگەند
هەرچی من جە تۊ، مەکەروون خیتاب
جە ڕووی سەداقەت، پېم بدەر جواب
حەزرەت، فەرماوا، کە ئەی بۍ خەبەر
بە (لات) و (عوززا)، سەوگەند من مەدەر
هەرگیز، نەدارووم، جە ئەو دوشمەن تەر
سەوگەند، هەر وەزات، دەهەندەی داوەر.[1]