سەرچەمەو واچۍ هۆرامانی
ئەوەنویستەی و دەسکاریکەرڎەی: ئەسعەد ڕەشید
بەشۍ چوارەمە

ئېمە پەی پەشتگېرتەی بەڵگە وەرینەکا، چن بەڵگێ تەرېما ئینێ وەردەسەنە:
-پیرشالیارە سېیاوە(پیرشالیارو کوجراتی هیندویی) وەختو وېش پاسە وچیان کە جە هیندستانۆ ئامان پەی هۆرامانی، پېسە مەڵڵێوە زەردەشتی، پەی زیارەتو گۊڕەو پیرشالیاری زەردەشتی، کە دمایی پېسە (زیرگەوان)ێ مەنەنۆ و نەگېڵانۆ.
-ئامای(هوزو هیندوان)ی جە هیندستانۆ پەی هۆرامانی تەختی و نیشتەجابییەیشان ئەچاگە بە نامۍ (شېخە حەکیمەکا هۆرامانو تەختی)، تاکو ئارویچ ئا هۊزە، بە نامۍ هوزو (هیندوان)ی تاریخو وېشان مەگېڵناوە کە چەنی بە کۊمەڵ جە هېندستانۆ کۊچشان کەردەن پەی هۆرامانو تەختی، ئینەیچ ڕاسیێن، پەیلوا وەڵینەکەیما سەلەمنۊ.
-مەنەیۆ نامۍ(تەخت)ی پېسە (پایتەخت)ی، کە بە هۆرامانو تەختی نامۍ بریۊن، کە ماچان پایتەختو زەردەشتیان بېیەن، ئانەیە سەلەمنۊ کە هۆرامان بە نامۍ وڵاتو(خوڎای)ۆ نامۍ نریان (ئاهورامەزدا).
-زەردەشتییەکۍ بەرو هۆرامانی، ساڵێ جارێ پەی بەشداریکەردەی جەژنەو پیرشالیاری، پېسە حەج کەردەی، سەردای هۆرامانی کەران، پەی نموونەی (فرەوەشی) واچۍ: گرڎساڵێ جارێ، تاتەم پەی زیارەتو پیرشالیاری، سەردای هۆرامانی کەرۍ.[1]