کوردایەتی جە هۆرامانەنە
ئەوەنویستەی و دەسکاریکەرڎەی: ئەسعەد ڕەشید

ساڵەو 1961ز، وەختێ کوردایەتی شېوە شوڕشێش وەرگېرت، یانی شوڕشێ سەرتاسەری درېژخایەن، هۆرامانو پانیشتی(ئێراق)، باوشی و ئامېزش پەی گېرتۆ، هەرچن ناوچەکە جە 33 دەگایا و شارەکڵا زیاتەر نېیەن.
1.وەختێ شۆڕشو ئەیلولی/1961زاینی، خېزیا، هۆرامانیچەنە ئاڵاو شۆڕشی بەرز نریا، چوار بنکۍ(مەخفەر)ۍ پولیسی جە(تەوېڵۍ، سوسەکانە، بېیارۍ، خورماڵ) بېنۍ، وەرپەرسو شوڕشی چی ناوچەنە ماموسا شېخ حەمە ئەمینو عەبابەیلۍ بۍ. شورشکەرەکۍ وەڵتەر چەنی پولیسەکا مەخفەرو تەوېڵۍ ڕېکۍ کەوتېبېنۍ، کە وېشان دا دەسۆ، چوونکم گەر مەخفەرو تەوېڵۍ گېریۊ، ئەوۍ تەرۍ گېرتەیشان ئاسانەن، دماجار بېجگە دوۍ پولیسا، تەمامو چەکدارەکا وېشان دان دەسۆ، بەڵام دوەکەی تەر وېشان یاونا هەڵەبجە، پەی باوشەو میری. ئیتر هەتا ئاشبەتاڵ(16/3/1975)ی، تەوېڵۍ و بېیارۍ بنکۍ هېزو خەباتی بېنۍ، کە سنووری جوگرافی هېزەکەی، جە پانیشتو پېنجوېنۍتاکو دەربەن بېلوولە، پانیشتو وەرنیشتو دەربەڼیخانی.
ماوەو ئا چن ساڵەینە، وەرگیری جە ناوچەکەی کریان و پېسە ناوچێ ئازاڎی پارېزیان، هەرچن شاڵاوۍ سەربازیېچش پەی کریێبا، وەڵتەریچ، خەڵکو ناوچەکەی، جە ساڵە وەڵینەکانە، وەرگیریشان جە شاڵاوە دڕندانەکا دژمەنی کەردەن، پېسە شاڵاوەو ساڵەو(1964ز)، بە فەرمانداری(زەعیم سدیق)ی، کە بە دڕڼەیی ئەشناسیابۍ.[1]