#بېسارانی#
تافی دېۋەزناۋ، تافی دېۋەزناۋ
بولعەجەب تافەن، تافی دېۋەزناۋ
پەرېشان، عاشق، دەوەندەن بە تاو
بۍ سەبر و ئارام، بۍ خورد و بۍ خاو
نە لادۍ قەرار، جە ئاما و لوان
نە دەمی ساکن، جە دەنگ و دەوان
مودام بە سەد ڕەنگ نەغمە پەردازەن
مرواری غەڵتان پەی نسار سازەن
نەنیشۊ لەحزەی نەدارۊ درەنگ
موغەنی نەواز بە سەد هەزار ڕەنگ
من مودام حەیران جە پەشېو حاڵیش
جە بۍ خاوی و شەوق، جە لائوباڵیش
پەرسام ئەر هەی تاف دېۋەزناۋ مەکان
جە شېوەی دېۋان گېرتەنت نیشان!
دائېما سەرسام عاشق شېوەنی
جە عېشقی کېیەن بەی تەور لېوەنی؟
واتش هەی ئەبلە، کەم فامی سەرشېت
گۊشدەرە پەنەم تا بواچۇن پېت
ئەی سۊز و سەودا، ئەی بېقەراری
ئەی چەرخ و قسە، ئەی بېموداری
ئەی گەوهەر پاشی و ئەی دوڕ ئەفشانی
مرواری سازی و نقېم نیشانی
جە شەوقی ئانەن، منیش کەرد پەیدا
هەر جە عەشقی وېش شېتم کەرد شەیدا
بەی گشت شېوەوە بېقەرارەنان
پەی نساری ئەو منەت بارەنان
هەر کەس جەی دنیا عاشقی سادېق بۊ
سەرباز وېنەی باز، دڵ موافېق بۊ
[1]