باخچێوە بېگەرد
نویستەی: میرزا ئۆلقاڎرو پاوەی
بەشۍ سەڎ و حەفتا و دوەمە
حەزرەت دیسان تەشریفی موبارەکش پەی (مەروە و سەفا) ی بەردەوە، چاگە دیسان نیداش کەردەوە پەی خەڵکی: (خوڎا یەکێوەن، خالق و مەخلووقاتین، ئیمان باوەردۍ) .
جە ناگا ئەبوجەهلی کافر ئاما، پېخامئاوەرش سەنگ واران کەرد، لاشەی موبارەکش گوڵگونین بی، بە پەلە وېش یاونا کەش و کۊ.
حەزرەت وەی گرد دەرد، وەی جەور و جەفا
دیسان تەشریف بەرد وە مەروە و سەفا
سێ جار نیدا کەرد وە ئاوازی نەرم
وە قەومی قوڕەیش تایفەی بۍ شەرم
فەرما: تا سەریح بواچوون پېتان
من پېغەمەرم مەعلووم بۊ لېتان
بەبۍ مەعرەکە، بە بۍ داداران
ئیمان بە خوڎا و بە من باوەران
مەعبوود یەکێوەن تەنهاو لا مەکان
زاتی بۍ زەواڵ جانی وە جان ستان
خالق هەر ئەوەن ئېمە گرد مەخلووق
عالەم گرد مەشۊ تیپ تیپ و جوق جوق
مەخلووق گرد فانی مەبۊ وە تاقی
خالق هەر وېشەن مەمانۊ باقی
سێ جار نیدا کەرد، نە ئەی خەلایق
بەرکەردەن جە دین ئەمری نالایق
موشریکان یەکسەر، نیگا مەکەردەن
پەیا پەی سوجدەی بتان مەوەردەن
ناگاه ئەبوجەهل مەلعوونی بەڎ ڕەنگ
بۍ حەیاو بۍ شەرم، گومڕا دڵ جە سەنگ
دەس بەرد یەک سەنگێ هەوادا بە قار
دا وە پېشانی موستەفای موختار
خوون ئالوو کەردش جەبهەی مونەوەر
هوونین بیی ڕوخسار پاکی پېغەمەر
شەندەن وە حەزرەت شای فریشتە خۊ
گوریزا جە تاو، ڕوو نېیا وە کۊ
جە دەسی قوڕەیش قەبیلەی بۍ دین
وەبۍ ئیختیار کەوت ئەو ڕووی زەمین.[1]