باخچێوە بېگەرد
نویستەی: میرزا ئۆلقاڎرو پاوەی
بەشۊ سەڎ و نەوەڎ و پەنجەمۍ
میرزا ئۆلقاڎرو پاوەی، باس جە سەرەوەختو مەردەی ئەبوتالیبی کەرۊن، چەنی وەسیەتو ئەبوتالیبی پەی کەسە نزیکەکاش.
چوون ئەبوتالیب شای عالی نەسەب
سەرداری سەربەرز تایەفەی عەرەب
ناگاه دەردی سەخت بیی بە دووچارش
بڕیا پای تاقەت سەبر و قەرارش
کېشا پەیا پەی هەناسانی سەرد
بەنی هاشمی یەکسەر تەلەب کەرد
واتش: وەسیەتم ئېدەن جە یاران
جەو دما پەندم نیگاه بداران
ئەوەڵ: پەی حورمەت کەعبەی موعەززەم
قەدرش جە لاتان هەرگیز نەبۊ کەم
دوەم: سیلەی ڕەحم مەکەن فەرامۊش
حەرفم چوون حەلقە بگېردۍ نە گۊش
یەرەم: ئەمانەت شمەو محەمەد
هەرگیز جە لاتان قووەتش نەبۊ ڕەد
کوتایی مەکەن جە ڕیعایەتش
غافڵی مەکەن جە حیمایەتش
لازمەن دایېم ئا بەرگوزیدە
نەعلەینش بنیەین، وە بانی دیدە
مادام الحیات، جانب داریش کون
چوون خواجەی غوڵام خزمەت کارش کون
ئەمینی قوڕەیش پاکی بېعەیبەن
سدیقی عەرەب ئەسراری غەیبەن
ماموورەن بەئەمری خوڎای لامەکان
زاتی بېزەواڵ جان دەری جان ستان
غەنی قەوم موحتاج، شامی شەو مەبان
یەکسەر گرد گەدای قاپی ئەو مەبان
بە خوڎا دنیای دوون قاف تا بە قاف
ئەشرافی ئافاق زەعیفی ئەتراف
مەبۊ سەرانسەر گرد وە بەندەی ئەو
عەبدی دور نە گۊش وە زەڕ سەندەی ئەو
جە هەردە مەزار عالەم پاکتەرەن
جە پېغەمەران شەرەفناکتەرەن
ئەخبارش جە تیر خەدەنگ ڕاستەرەن
دینش جەئەدیان وەرین خاستەرەن
خەوف بکەن جە تیر دوعای محەمەد
حازرەن دایېم خوڎای محەمەد
بڵندەن ڕوتبەی فەزڵی محەمەد
نمەبۊ هەرگیز عەزلی محەمەد
ئەرفەعەن هیممەت ئەعلای محەمەد
شیرینەن کاکوڵ شەهلای محەمەد
مەرقوومەن جە عەرش ئیسمی محەمەد
لەتیفەن جە نوور جیسمی محەمەد.[1]