فەرمانداری فەتح عەلی سانی، کوڕو محەمەد تایەر سانی، سەرو هۆرامانی تەختی و لهونیرە.
وەختێ (حەسەن عەلی خان) کوڕو لوتف عەلی خانی کوڕو سوبحان وێردی خانی ئەردەڵانی نیشت نە پاو دەسەڵاتی پېسە والی سنەی، فەرمانداری هۆرامانیش پېشکەشو (فەتح عەلی سانی) کەرد، پا شەرتۍ (مەنوچەر سان) ی دەسگیر کەرۊن، یان دوورش وزۊوە.
دەگایەکاو (نوێن، کەڕاوا، کوڵی ملەی) یشان وستېنە چېروو دەسەڵاتو محەمەد یوسف سانی، پەوکەی پیێکۍ مەنووچەرسانی، دەگاو (نوێن) یشان جە دەس ئەساو دەگاو (کەڕاوا) یشان گڕدا.
تۊڵەو ئا کارەینە، والی سنەی میرزا لوتفوڵڵاش ڕاسپارد تاکو چەنی (فەتح عەلی سانی و حەسەن بەگی و محەمەد یوسف سانی و عەبدولغەفار بەگ) ی بە گردیشاوە، بە لەشکەرێ فراوانۆ هېرش کەرانە سەرو خېڵو مەنوچەرسانی.
فەتح عەلی سان داواش وەنەکەردۍ و دەسوەڵیش کەردو وېش یاونا (نۆسوڎ) ە، خېڵو مەنوچەرسانی نۆسوڎەشا جیائاستە.
قەرار دریا کە (میرزا لوتفوڵڵا و حەسەن بەگ و ئەسکەڼەرسان و عەبدولغەفار بەگ) گنا شۊنیشا، وەختێ یاوێ دەگاو (هانەگەرمڵە) ی، مەنوچەرسان و برێکېش چەنیشان دەسشان گیربی یۊترینی، پېسە وەرگی گنۊ دلۍ گەلەی، تەفرو توونێشا کەردۍ.
هامکات محەمەد بەگ چەنی کەسێ بە نامۍ (داوود) ی کۊشیێ و باعزێشا ڕووتۍ کەردێ و ماباقیشا ڕاوەنیێ.
دمای قومیاکەی، کارەساتەکەشا پەی والی سنەی باسکەرد، والی یاوانە کە ئاڎۍ نمەتاوا چەنی مەنوچەرسانی وەراوەریۍ کەران، بە ناچاریۍ دیسان دەگاو (نۆسوڎ) ېشا داوە دەسو عەلی مەردان سانی، تاتەو مەنوچەرسانی.
وەختێ عەلی مەردان سان جە شارو سنەیۆ ڕەوانەو نۆسوڎۍ کریا، کوچێ ناساخ بۍ، بە یاوایش بە دەگاو (نۊدشە) ی، کوڕەکېش و برێکېش ئامێ پېوایشۆ، وەڵۍ ئانەی یاوناش نۆسوڎە، گېیانش ئەسپارا.
کۊچی دمایېنو عەلی مەردان سانی ساڵەو (1213ک) ی وەرانوەرەن چەنی ساڵەو (1798ز) ، کوڕەکېش نۆسوڎەشا وستە چېرو فەرمانداری وېشان.[1]