ئەو درامایانەی زۆرکات سەرنجم ڕادەکێشن و واملێدەکەن بە چێژەوە تەماشایان بکەم ئەوانەن کە چیرۆکەکەی دەروونییە و بە جۆرێک لە جۆرەکان باس لە دەروونی مرۆڤەکان دەکەن و لە ناخی کاراکتەرەکاندا قووڵ دەبنەوە یان باسی کێشە دەروونییەکان دەکەن لە کۆمەڵگەدا، ساڵی 2022 تەماشای دوو درامای لەو جۆرەم کرد کە بەڕاستی چێژێکی زۆرم لێبینی و هەردووکیان دوو درامای سەرکەوتووی کۆریای باشوورن و بینەرێکی زۆریان هەبووە ئەوانیش درامای (Flower of Evil) واتا گوڵی خراپەکار لەگەڵ درامای (Its ok to not be ok) واتا ئاساییە باش نەبیت، تەنانەت یەکەمیان چەند کۆپییەکی بە زمانی دیکە لێ بەرهەم هاتووە، هەردوو دراماکە کار لە ناخی بینەر دەکەن جگەلەوەی وەکوو هەمیشە ئەکتەرە کۆرییەکان نواندنێکی کەموێنە پێشکەش دەکەن و بە ڕای من هەر کەسێک حەز بە تەماشاکردنی ئەو جۆرە درامایانە دەکات پێویستە ئەو دووانە ببینێت.
لە درامای گوڵی خراپەکار-دا کە درامایەکی پۆلیسیی و گومانە خاڵێکی زۆر گرنگ دەوروژێنرێت ئەویش ئەوەیە کاتێک لەلایەن کۆمەڵگەوە حوکمی پێشوەختە دەدرێت بەسەر کەسێکدا و بەهۆی خێزان و ئەو ژینگەیەی تێیدا گەورە بووە کەسێکی بێ تاوان تاوانبار دەکرێت و بە جۆرێک ژیان و دەروونی دەشێوێنرێت تەنانەت خۆشی قەناعەت بەوە دەکات کەسێکی بێ هەست و خراپە و ناتوانێت هەست بەخۆشەویستی بکات، هاوکات باس لەوە دەکات زۆرجار مرۆڤەکان زۆر ئاسانە لایان ژیانی ئەوانی دیکە تێکبدەن و ناویان بزڕێنن بەبێ ئەوەی ویژدانیان ئازاریان بدات و وا هەست دەکەن کارە ڕاستەکەیان کردووە.
دراماکەی تریان لە بەرهەمهێنانی نێت فلیکس-ە و باس لە نەخۆشخانەیەکی دەروونی دەکات، هەموو ئەڵقەیەک لەگەڵ ڕووداوە سەرەکییەکی دراماکەدا چیرۆکی یەکێک لە نەخۆشەکان باس دەکات، بەڵام جوانیی ئەو درامایە لەوەدایە برا گەورەی پاڵەوانەکە ڕۆڵی کەسێک دەگێڕێت ئۆتیزمی هەیە و بەشێکی زۆری جوانیی ئەو درامایە لە نواندنی ئەو ئەکتەرە و چۆنیەتی پەرەسەندنی کەسێتی ئەو کاراکتەرەدایە، کەمجار ئەکتەرێک دەبینیت وا بە سەرکەوتوویی و پرۆفێشناڵانە ڕۆڵێکی ئاڵۆزی وا بگێڕێت، هەروەها دراماکە ئەو ڕاستییە دەخاتەڕوو کە هەموو مرۆڤەکان بە جۆرێک لە جۆرەکان گرێی دەروونیان هەیە و پێویستیان بە ڕێگەیەکە تاوەکو تێی پەڕێنن وەکوو چۆن پاڵەوانەکە کە پەرستارە لەو نەخۆشخانەیە لە دیمەنێکدا بۆی دەردەکەوێت خۆی لە هەموو کەس زیاتر ناخی تێکشکاوە و پێویستی بە چارەسەرە، ستایلی ئەم درامایەم بۆیە لام جوانە کچە پاڵەوانەکە نووسەری چیرۆکی ترسناکە بۆ منداڵان و خاوەنی کەسایەتییەکی تاریک و نامۆیە، هەموو ئەڵقەیەکیش کچەکە بە گێڕانەوەی چیرۆکێکی ترسناکی منداڵان، بەڵام پڕ مانا دەستپێدەکات و لەکۆتایی هەڵقەکەدا تەواوی دەکات. [1]