#بېسارانی#
وەهار یاواوە، وەهار یاواوە
فەرشی سەوز نە ڕۇی چەمەن یاواوە
باد پېچیا وە بەژن خونچەی ساواوە
خونچەی ساوا، وېش پەل شکاواوە
جەلا دا جەمین، خاڵی نەورۊزان
چۇن ساحېب جەماڵ نېیەن جە هۆزان
وېنەی سپی لاڵ، قەترەی زەڕئەفشان
جا بەردەن جە پېچ زوڵفی مەهوەشان
سونبوڵان نەوەر زوڵف چەنبەر نېیان
دەور بەستەن نە دەور، خاڵ عەنبەر نېیان
فەسڵێوەن، ئېمە و بوڵبوڵان هەرشەو
سەد فرسەخ دۇر بیم، جە مەنزڵگای ئەو
ئەوان بە ناڵین، من بە سۊزی زار
کەردێمان جەستەی سېیا سەنگ بېدار
تا ئاخر چۆن بۊ سەرئەنجاممان
مەردەن، یا وەسڵی دلبەر، کاممان؟
[1]