باخچێوە بېگەرد
نویستەی: میرزا ئۆلقاڎرو پاوەی
بەشۍ یەرەسەڎ و ویس و پەنجەمە
ئەسەفی ڕەهبان، سەلمانش بەرد پەی لاو وېش، چاگە پېسە خزمەتکاریش بۍ، بەڵام وەرە وەرە سەلمانی ۋت و ۋریا، خاس یاواشەنە کە ئەسەف ڕاس نمەواچۊ، پەی خوڎایش نمەکەرۊ، دینداریەکەش تەزویرەن، جە ماڵو کەنیسەی، جە خێروخێراتی یەک عانە نمەبەخشۊ بە هەژارەکا و ئاتاجەکا، سەلمان نائومېڎ بی، ئاسەف مەرد، ئیتر سەلمانی فارسی گردو تەرساکاش چڕیۍ، خەزېنەکەش نیشانە دێ کە شارابېشۆ، ئاڎییچۍ لاشەکەو ئەسەفیشا هۊرواست پەی عیبرەتو زەمانەی، کەسێ تەری جە خوڎا تەرسشا نیا یاگەکېش، چەنی سەلمانی خزمەتو کەنیسەکەینە بېنۍ.
القصە، ئیلتیماس سەلمان قبووڵ کەرد
دەر ساعەت مەنزڵ ئەو وە لای وېش بەرد
غەرەز تا چن وەقت سەلمان جە لاش بۍ
هەر سوبح تا ئېوار پاشیلی پاس بۍ
تا خاس بەڵەڎبیی جە ڕەفتاری ئەو
زانا زاهیدیش پەی خوڎای نېیەن
هەرچی ئەو کەردەن گرد تەزویر بېیەن
مەوقووفەی کەنیشت، کڵېسا تەمام
نەزری تەسەدوق، خەیری ئەهلی شام
گرد جەم کەردەبۍ نە یەک زەمینە
کۊکۊ کەردەبۍ نە یەک خەزېنە
بە موستەحەققان هەگیز یەک دینار
مەسرەف نمەکەرد، جەو هەزار هەزار
سەلمان مەئیۊس بیی، جە دینی ئاسەف
جە وەزعی ڕەفتار ئاینی ئاسەف
وە حوکمی قادر کەریمی کارساز
ڕوحش جە قاڵب بەدەن کەرد پەرواز
مەخلووقات یاوا تەوق تەوق و چین چین
بکەران ئاسەف تەجهیز و تەکفین
سەلمان وات: لایەق وە مەدفوون نېیەن
تاهیر بۍ ئیمان جە دین بەرشییەن
هەرچی مەوقووفات، هەن جە موڵکی شام
ماباقی، ئیحسان خەیر و خاس و عام
نامووسی مەسرەف هیچ کەس نەکەردەن
گرد جەم دان پەی وېش تا ئیسە مەردەن
واتشان: چە تەور مەعلوومەن ئەی کار
واتش: دەفینە ها گرد ئاشکار
یاران جە ئاسەف بە دڵ پەرېشان
گەنجینەی ئاسەف، نمانا پېشان
تەرسایان واتەن: جە دین بەرشییەن
وەڵڵا بە لازم تەکفینش نېیەن
نەعشی ئاسەف، هورکېشا نەدار
کەردشان جاریی گردین سەنگەسار
یەک شەخسێ عابید زاهید بی تەمام
نە جای ئەو کەردەن بە قایممەقام
سەلمان و عابید دەردەم بۊسا دەس
خەیلێ عەقیدەش بە ئەو زاهید بەس
جە لای ئەو دۊس کەرد وە جان نساریی
بە دیڎە و بە دڵ، خزمەتگوزاریی
چن وەقت جە لای عابید سلووک کەرد
تا یەکشەو عابید کېشا ئاهی سەرد
واتش: ئاخ پەی مەرگ یاوانم واڎە
ئەجەل پەی ئەروام مدران ئاماڎە.[1]