شەماڵ ... پەیک ... قاصد
شەماڵ واچێوە بنەچە عەرەبېیەنە، بەڵام ئیسە بەرگ و ڕەنگ و ڕۋێ هۆرامیانەش گېرتەن.
شەماڵ هەواو باکوریەن کە هۊرمەکەرۊن، یانی هەواو شیمالی کە بە عەرەبی (شمال) .
شەماڵ جە لاو شاعېرو عاشقەکاوە کاری بنەڕەتیش نامەبەردەیەن، یانی نامەو هەواڵو میانو عاشقەکا مەیاونۊ بە یوترینی. سەردەمە وەڵینەکانە کە ئامرازو پېوەڼی نەبېیەن، شەماڵ ئەمین و مەحرەم بېیەن پەی یاونای خەبەرو عاشقی و مەعشوقی.
شەماڵ دمای یاونای نامۍ عاشقی پەی مەعشوقی گوزەرێش کەردەن دلۍ زوڵفان و هەم باخ و سینەو مەعشوقېرەو جە نیمەشەوەنە یاونانشۆ پەی دەماخو عاشقی. هەر پېسە صەیدی هۆرامی مەپەرسۊن شەماڵی کە پېسە عەتارێ بۊن ۋرەشی ڕاگوزەر بە زوڵفان و سینەو یارەکېشەرە، بارت چېشەن؟ شەماڵیچ ماچۊ ئانە بۊی عەترو زوڵفان و یاریتەن.
چوون عەتار بە چین زوڵفی یارەوە
ئاما بە بۊی عەتر عەنبەر بارەوە
پەرسام ئەی عەتار، یە چېش بارتەن؟
وات: بۊی عەتری زوڵف گیسووی یارتەن
بەڵام میرزا ئۆلقادرو پاوەی جە گردی وەشتەر چەنی شەماڵ (پەیک) ی مەگنۊ گفتوگۊ، ئاڎ شەماڵی بە ئەمین و مەحرەم و لاو یارەکېش مزانۊ.
پەیکی بېستوون، دەلیلی دووجەیل
مەست بۊی شیرین، کەیل جە عەتری لەیل
شانای تای توغرای زوڵفی تەتاران
هامڕازو هامدەم دیدە خوماران
سا دەخیل شەماڵ تاقەتم تاقەن
دڵ نە گېجی مەوج سەودای فیراقەن
جەستەی پەشېوحاڵ شادی بەتاڵم
جە دووری ئازیز دەروون زوخاڵم
تۊ نەسیم سوبح سەر دیارانی
ئەمین و مەحرەم لای نازارانی
تۊ گەنجی قەیسەر وە دەوان دەو
وە تاراج بەردی پەرۍ کەیخەسرەو
نامەی شیرینت وە فەرهاد سپەرد
فەرهاد جە ئاهش سەنگ مەبی وە گەرد
مینگەت ۋست وە لای باوانی لەیلۍ
عەرزەی قەیس وانای فرەجار خەیلۍ
دڵەی کوس کەوتەی قەترانی حەیدەر
شاد کەردی وە دین دیدەی سنەوبەر
پەی یۊتەر نامان ئاوەردەی هەواڵ
یە هەر ڕەسمی تۊن فیدات بام شەماڵ
سا دەی وېت ئاسا هۊرزە ئاخېزکەر
مدارا مەکەر وە یادی دولبەر.[1]