بنەچەو بەگزاڎەکا هۆرامانی
بەشۊ ششەمۍ

بارام میرزا بەگ:
دمای کۊچی دمامیینو سڵېمان بەگی، بارام میرزا بەگی کوڕش جە لاو شووراو خەڵکو هۊرامانیۆ هورچنیۊ پەی حوکمڕانی هۆرامانی، هەر چا سەروبەڼەنە (شا تەهماسبی سەفەوی) لوان سەرو تەختو دەسەڵاتو ئێرانی، بارام میرزا بەگ وېش بە شاو سەفەوی ئەشناسان، هەر چاگەیچۆ تاوانش کناچۍ (ئەڵاوێردیخان) ی حاکمو لوڕستانی داواکەرۊن، چا ژەنۍ یەرۍ کوڕېش بیېنۍ پی ناما (سڵېمان بەگ، حسێنقولی بەگ، عەباسقولی بەگ) .
بارام میرزا بەگ، سەردەمو حوکمڕانیەکەیشەنە کەسێ داڎۋەرو مروڤ دۊس بېیەن، هۆڵېش پەی ئاسوودەیی و وەشگوزەرانی خەڵکی دێنۍ، بە ئایین ئەشناسی و دینداری نامبانگش لوان.
حوکمڕانی بارام میرزا بەگی، تاکو ئا دەمە (خان ئەحمەڎ خانو ئەردەڵانی) جە سەفەویەکا هۊرگېڵانۆ، بۍ گېرمە و کېشە بییەن، بەڵام دماتەر پا شېوە نەمەنەن.
خان ئەحمەڎ خان، وەرو ئانەی فرە قینیش جە (شا وێردیخان) ی ژەنبراو بارام میرزا بەگی بیېنە، ئاڎییچ تلیان قینەکېشۆ، دەسشکەردەن دژمەنایەتی بارام میرزا بەگی، سوپێوە گۆرېش سازەدێنە پەی پەلاماردای هۆرامانی، سەرەتا ژمارێ فرۍ جە دەگایەکاو هۆرامانیش داگیرۍ کەردېنۍ و دماتەر تۊقەو قەڵاو هۊرامانیش دێنە.
دمای ئانەی بارام میرزا بەگو چەکدارەکېش بە تەمامی زۊرشا پەی ئامان، قەڵاکېشا چۊڵە کەردېنە، بەڵام بەبۍ ئاگا، نەفەرێ جە پیاکا بارام میرزا بەگی وېش دزۊوە چەنەشاو مەلۊ پەی قەڵاو زەڵمی، چاگە هەواڵەکەش یاونان بە خان ئەحمەڎ خانی، ئاڎییچ لەشکەرێ یەرەسەڎ نەفەری بە فەرمانداری (عەلی بەگ زەڵمی) مەکیانۊ سەرشان، چا جەنگەنە بارام میرزا بەگ زامڎار کریۊ، جە سەختی زامەکەیشەنە گېیانش مسپارۊ.[1]