واتەو گۊشگېرتەی مېیانو ئاسمانی و زەمینی
بەشۊ ششەمۍ
سەرجەنۊ زەمین جوابو ئاسمانیش داوە، ماچۊ: ئەی ئاسمان، تۊ بە بەرزی و وېپەسینیتەرە نازی، ئەی نمەزانی ئانۍ کە بڵند و بەرزېنی جە ئادابیۆ دوورېنۍ، تۊ شانازی کەرین هەکە یاگۍ مەلائیکانی، ئەی نمەزانی من سەڎ و ۋیس و چوار هەزار پېخامئاوەرۍ پەشتیمۆ ئامێنۍ و لوێنۍ، من خاوەنو زەمینو(بوقعە)ینا، من خاوەنو کەشو سیناینا، ئێتر چانەی زیاتەر فەخر نمەکەرە، چېشت جە من زیاڎتەرەن.
جە نۊ هەم زەمین ئاماوە گوفتار
واتش ئاسمان بەرزی بۍ مەدار
(حدیث)ەن، بوڵەند جە ئاداب دوورەن
هەر جنسی بەرزەن هەر بۍ شعوورەن
تۊ مەلائیکان وە چەم مەداری
(مسجد لاقصی)ی پەڕگەوهەر داری
منیچ هەم جە پەشت شای (ابوالبشر)
سەڎ و بیس و چوار هەزار پېغەمبەر
گرد جە خاک پاک بۍ گونا داروون
چن شەمع باتن ئەولیا داروون
چن شېخ کامڵ چن مەڵڵا داروون
چن هەزار هەزار (بیت‌الله) داروون
ئەرز (بوقعەی) پاک جەبەڵ نوور داروون
سفتەی لیقای حەق سوورمەی توور داروون
فەڵەک جەی فېشتەر ئیفتیخار مەکەر
ئاخر هەر خاکی هەی خاکت وە سەر
خاترت وە کام مەراتیب شاڎەن
بنمانە چېشت جە من زیاڎەن
ها واتم وە تۊ گفتوگۊ تەمام
جوابت چېشەن ها من گۊشەوام.[1]