خاک و سامانو وەڵاتی ئامانەتەن.
ئېمە پېسە میللەتو کوردی، ژیوگەما و سامانی سرووشتیما ئەمانەتېنۍ، مەشۊم بە هیچ کلۆجێ غەدرشان وەنە نەکەرمۍ، چوونکوم تەنیا موڵکو چن کەسێما نېیەن، بەڵکووم مافو گردیما ئینا سەرشاوە، هیچ کەسێما، یان تیرەو هۊزێما بە تەنیا پەیش نېیەن سات و سەودا و مامەڵەشا پۆوە کەرۊن، خیانەتشا وەنە کەرۊن، خەڵاتو داگیرکەریشا کەرۊن. ئەچی بارۆ ڕازێ وەشە هەنە، کە باس جە ئامانەت پارېز کەرۊن.
ڕوێ پیېوە خیاڵش بۍ بلۊ پەی سەفەری، بازعزێ زەڕش بۍ گەرەکش بۍ بڎۊش دەسو کەسېوە، وەروو وېشەرە واتش: قازی جە گرکەسی دڵنیاتەرا، زەڕەش هۆرگېرت و بەردش پەی قازی هەتا بە ئەمانەت هۊرش گېرۊ ، قازیچ هۊرش گېرت و وستش دلۍ سڼۊقوو ئەمانەتی، عانێ کابرای ساحېب زەڕ سەفەرەنە گېڵاوە، لوا پەی لاو قازی و داواو ئەمانەتەکەیش وەنە کەردۆ، قازیچ کەردشۆجواب: ئەمانەتوو چېشی؟ من کەی تۊم دیەنی؟ کابرا خەفەتی گېرتەرە و داڎش بەرد پەی لاو حاکموو شاری، حاکمیچ واتش: سەبای قازی مەی پەی لاو من، عانێ قسۍ کەرمۍ تۊ داواو ئەمانەتەکەیش وەنەکەرە، پەی سەوایشۆ وەختارۍ قازی ئاما پەی لاو حاکمی، حاکمی پەنە وات: من چی مانگېنە نیازو سەفەرو حەجیم هەن، خیاڵما دەسەڵاتوو ئی وەڵاتیە بسپاروو دەسو تۊ هەتا حەجەنە مەگېڵوە، چوون ئەمانەتداری نەبۊ چېوېتەرم پۆوە نەڎیەنی!
چی بەرەگانە ساحېب ئەمانەت ئاما چوەر و سڵامێوەش کەرد و واتش: قازی ئامانا پەی ئەمانەتەکەیم! قازیچ وات : ئانە کرېڵوو سڼۆقەکەی بەرەو زەڕەکەیت هۊر گېرە و لوە،
دوۍ ڕوۍ دماتەر قازی لواوە پەی لاو حاکمی هەتا جە بارەو ئەسپارای دەسڵاتیۆ پېوەرە قسۍ کەرا، وەختێ باسشا دەس پەنەکەرد ، حاکمی وات: قازی ئەمانەتوو ئا پیایما چەنە نەسانایۆ هەتا وەڵاتێما پەنە نەۮای!
ئیسە پەی سانایۆ وەڵاتی، مشیۊ چېشت پەنە دەیمێ هەتا سانمېشەو؟
حاکم دەمو دەس دەسوروو بەرکەنارو قازیش دا.
حەزرەتوو موحەممەۮی (سڵاموو خواۮیش وەنەبۊ )
فەرماوۊ :
تەماشەو نما و ڕۊچە و حەجیشا نمەکەردۍ، سەرنجوو ڕاس واچی و ئەمانەتداریشا گېردۍ.[1]