دلۍ گرد میللەت و نەتەوێنە خەڵکانۍ دز و گەڼەڵۍ هەنۍ، ئا نۊعە کەسۍ تەنیا بە یاسا سنوورشا تەسک کریۊوە، ئانە دەسەڵاتەن کە جە ڕاو یاسایۆ خەتەو ئا سنوورەیە کېشۊن، خۊ گەر حاکم وېش دز و گەڼەڵ بۊن، ئیتر کار جە کاری ترازیۊ و بۊگەنی سەراپاو میللەتی گېرۊوە، چی بارۆ ڕازێ مەگېڵنمێ:

جوانێوە خەڵکو دەگێوە کوردەسانی کاسێوە هەنگوینش بەرد پەی شاری بە نیازو ورەتەیش، ماموورو وشکنای وەردەمو دەربازەو شارینە گېڵا بارەکەشەرە، وەختارێ زاناش جوانەکە کەم دەسا و چېوێش نېیا هەتا ڕەشوێوەش چەنە سانۊ، بە ئەنقەسی بەرەو کاسە هەنگوینەکەیش لابەرد هەتا مەشیش پۆوە نیشا.
جوانەکە هەرچی لاڵیاوە و واروو چوەرش کەرد، ماموور سەرەش نارد ڕاسی،
فرەش پەنە نەشی مەشی پېسەو پوورەو هەنگا نیشتۍ دلۍ هەنگوینی و جمەشا بڕیا، مامووریچ بەرەو کاسەیش نیاوە و داشۆ بە کوڕەکەی و واتش:
ئیسە بەرەش!
ئڼه مەشی چەقێبېنۍ دلۍ هەنگوینەکەی، هەر کەسېو دلۍ شارینە وینېش، قیزیش نەبەرۍ سانۊش.
جوانەیچ قوشقی بی و داڎش بەرد پەی قازی شاری، مەگیرە قازیچ شەریکە دزا و چەنی مەعمووری هامدەسا، عانێ قازی قەزاوەتش کەرد واتش: خەتاو مەشەکانە، خۊ بە دەسوروو مامووری نەنیشتېنۍ هەنگوینەکەیۆ، مشیۊ تۊ بلی هەقەو وېت جە مەشەکا سانیۆ، هەریاگێنە مەشېوەت دېیە تاوی کوشیش،
عانێ جوانو دەگاکۍ زاناش ماموور دزە دەسو قازین، واتش: ئاغەی قازی مەرحەمەتەتبۊ قاقەزێوەم دە، هەر یاگێوەنە مەشېوەم دېیە، هەقەو وېم سانوو، قازیچ دەسنویسێوەش دا پەنە و جوان مەحکەمەنە زیارە ،
سەوایشۆ جوانەکە خیابانەنە گېڵای گېڵۍ، کوت و پڕێوەنە قازیش دی کەمەشېوە نیشتۍ بۍ چڕ و چەمشۆ، ئېڎیچ تاکو گریکش چەنە بۍ شەپڵاخێوەش ماڵا مېیا چەما قازیرە، قازیچ هۊر چڵاکیاو خەڵکەکە دەسشا کەر خوای پەنەش، قازی دەسورشدا جوانەکەی بەرا پەی زندانی، جوانیچ سەرو وۍ حوکمەکەو قازیش ئەرمانا، قازی هەکە چەمش کەوت بە دەس و خەتەکەو وېش، ئینجا زاناش چ کەتنېش دێنە و واتش: ئینە شېتا من مژناسووش چی شارەنە بەرش کەردۍ![1]