بڕێ ماچان: پېیا بە وەفان پەی ژەنەکېش، بڕێ تەر ماچان: پېیا وەفاش نېیەنە، دمای ژەنەکېش مەساکیۊرەو یەکسەر ژەنەی تەرە مارۊن. مەگېڵناوە:
سی ساڵێ چېوەڵ کابرێوە ژەنیش ئاردېبۍ و دڵش بە ژیوایش فرە وەش بۍ، جە هامسەرېش فرە فرە ڕازی بۍ.
پەی نەگبەتی، ڕوێ جە ڕوا تووتە هارېوە دمابڕیا، گازیش گېرتە ژەنەکېش، ژەنۍ نەوەشە کەوتە، شۊنەو ماوېرە، شمە وەش!!
کابرا فرە مەلوول و مەیووز بۍ، پاسە دڵش مەڕیا و تەمیارە، ئیتر هازەو هیچیش نەمەنە، یانەنە نەزیېرە و گۊشەنشینیش کەردد پیشە.
زاڕۊڵەکېش وەختێ زاناشا تاتەشا حاڵش فەتووتا و وەعزەش ئاڎە نېیەنە، داواشا چەنە کەرد ژەنی بارۊ، بەڵام ئاڎ نەلا چېروو باری و تەمەو عەشقی وەڵینیش، کە ئەڎاو زاڕۊڵەکاش بۍ نەبڕیەش.
جە زاڕۊڵا واتەی و جە تاتەیشا نەژنیەی و ئینکار!!
شۊنەو ماوېرە، ئاخرش ستم و پاگیری زاڕۊڵەکا، هەرمانەو وېش کەردەش و کابرا ڕازی بی ژەنی بارۊ!
زاڕۊڵەکۍ کەوتۍ کون و کۊ، کناچېوە زەریفەی ویس و پەنج تاکو سی ساڵەشا پەی ئېستۆ.
زەماوڼڎێوە وەشەی تەمامەشا پەی گېرت و وەیوەشا سەروەش و دڵوەش ئاردە یانەو بەختېش!!
وەیوە، وەیوە نەبۍ و دانامېوە تەمامە بۍ، ئاڎە بە گرڎ بارێرە یاوۍ مېردەکەیشەرەو نەک هەر بېخاترش نەکەرۍ، بەڵکوو دایېم پەیجۊرەو ئانەی بۍ گەش و سەرحاڵ بۊ.
ماوېش پەنە شی، ڕیش چەرمە کە کەیل و سەرمەسوو ئی پېوەڼیە بۍ، زاڕۊڵېش چڕیۍ و بە ڕەسموو شوکرانەو ئی بەرەکەتیە، پەنەش واتۍ پەنج سەرۍ حەیوان سەرە بڕا و کەراش خەیرە!!
دوېشا بەینوو فەقیر و هەژارینە بەخشاوە، یوەشا بەینوو ۋاڵە و برایانە بەش کەران، یوەشا پەی واردەو وېشا!
زاڕۊڵەکۍ جە تاتەیشا پەرساشا: تاتە گېیان ئەی ئەوېشا چېش پەنە کەرمۍ؟!
تاتەشا ماچۊ: دەیدېش پا تووتەیە کە گازیش گېرتە ئەڎێتا، خوڎا خەیرەش بنویسۊ، ئەجۊم ئاڎ جە وېم خاستەر زانۍ خەیر و مەسڵەحەتم ئینا چېشەنە![1]