ناونیشان: گشتپرسی چی دەگۆڕێت؟
نووسەر:#هێمن عەبدوڵڵا#
ڕۆژی دەرچوون:#24-09-2017#
کوردستان هەموو دنیای بەخۆیەوە سەرقاڵکردووە. جاران دەمانوت زۆر گرنگە فڵان بەرپرسی گەورەی دنیا ناوی پێشمەرگە و کوردستانی هێناوە، ئێستا وتاری سەرۆک و سەرکردەکانی هەموو جیهان باسی گشتپرسیی کوردستانی تێدایە. کەچی کوردستان بڕیاری لێبڕاوی خۆیداوە و گشتپرسییەکەی هەر دەکات. چی ڕوویداوە و هەر وڵاتێک و لایەنێک چیی دەوێت؟
=KTML_Bold=تورکیا:=KTML_End=
ئاکەپە هەڵبژاردنێکی لەپێشە لە ساڵی 2019دا. لە پەڕڵەمانی تورکیا هەریەکە لە جەهەپە و مەهەپە لۆمەی ئەردۆغان و ئاکەپەیانکرد کە ئەو هەمووە ڕێزی بارزانی و هەرێمی کوردستانی گرتووە، کەچی ئێستا بارزانی حیسابی هیچیان بۆ ناکات. ئەردۆغان و ئاکەپە دووڕیانێکی دژواریان لەپێشە و بڕیاری گشتپرسیی کوردستان پلانەکانی ئەوانی تێکداوە. چونکە قبووڵی بکەن، دەنگدەری هاردلاینەری تورک لەدەستدەدەن، قبووڵینەکەن و دژی کوردستان ڕابوەستن، دەنگدەری باکووری کوردستان لەدەستدەدەن کە ژمارەیان گەورە و یەکلاکەرەوەیە. بۆیە تورکیا ناچارە تووند بێت و هەندێک کاردانەوەشی هەبێت، وەک کشاندنەوەی کۆنسوڵ و پێنەدانی ڤیزە بە هەڵگرانی پاسپۆرتی ئێراقی لەو ناوچانەی گشتپرسییان تێداکراوە و سنوورداخستنی کاتی و ژمارەیەک ئۆپەراسیۆنی ئاسمانیش لە #قەندیل# و چیای #شنگال# و #کەرکووک# و #سیدەکان#. هەموو ئەوانە ڕوو دەدەن و خەڵکی بێگوناهی سیڤیلی باشووریش شەهیددەکرێن لەسەر سنوورەکان، بەڵام تورکیا دەزانێ پاش گشتپرسی، کوردستان قازانجی بۆ ئەوان زۆرتریش دەبێ لە پێش گشتپرسی. بۆ نموونە تورکیا دەتوانێ ببێتە ناوبژیکار یان بەشدار لە تیمی ناوبژیکار لەنێوان #هەولێر# و بەغدا بۆ دانووستاندن لەسەر ئاییندەی ئێراق. مەزندە دەکەم تورکیا داوا لە کوردستان بکات تا دوای هەڵبژاردنی 2019 سەربەخۆیی ڕانەگەیەنن. ئەمە کارتێکی باش دەبێت بەدەست ئاکەپەوە بۆ هەڵبژاردنەکان تا بیسەلمێنێ بە حیکمەت و زانایی، سەرەڕای گشتپرسیش، سەربەخۆیی کوردستانی دواخستووە.
=KTML_Bold=ئێران:=KTML_End=
بەپێچەوانەی ئەوانەوە کە پێیانوایە ئێران لە گشتپرسی تۆقیوە، من پێم وایە لەو هەڵوێستانەی لە بەغدای ژێر هەژموونی ئێرانەوە دەیبینین، دەریدەخات ئێران پێیخۆشە گشتپرسییەکە بکرێت. کوردستان بشبێتە دەوڵەت ناتوانێ و پێویستی پێنییە ببێتە هەڕەشە لەسەر دەوڵەتێکی گەورەی وەک ئێران. بەپێچەوانەوە لە سەردەمی ڕەزاشا و حەمەرەزا شا و خومەینی و خامنەییشدا ئێراقی یەکگرتوو هەمیشە هەڕەشە بووە لەسەر ئاساییشی ئێران. جیابوونەوەی کوردستان لە ئێراق بەواتای ڕادەستکردنی بەغدایە لەسەر سینییەکی زێڕ بە ئێران. بیرتان نەچێت کوردستان بازاڕێکی باشیشە بۆ ئابووریی ئێران کە پێدەچێ ترەمپ دیسان بینەقاقایان بگرێتەوە و ئومێدی بووژانەوەیان کەمبکاتەوە. کاردانەوەی ئێران ڕەنگە زۆر تووندبێت بەڵام ئەوەندە نابێت کە ئاگری شەڕ بخاتە سەر سنوورەکانی خۆی. بیرتاننەچێت ئێستا ئێران ئاگری شەڕی بردووەتە سووریا و یەمەن و ئێراق و هیچیان لەسەر سنوورەکانی خۆی نین. شەڕ لەگەڵ کوردستان و پێشمەرگە و خەڵکی کوردستان بۆ ئێران ئاگربەردانە لە ماڵی خۆی کە ترەمپ و ئیسرائیل بە پارە دەیکڕن. تاران پراگماتیکییە و پاش گشتپرسیش پەیوەندیی لەگەڵ کوردستان ناپچڕێنێ و هەوڵدەدات هەندێک هێزی کوردی هەر لەژێر هەژموونی خۆیدا بهێڵێتەوە.
=KTML_Bold=ئەمریکا:=KTML_End=
بۆ ئەمریکا گشتپرسی هەم باشە و هەم خراپە. بۆیەش دژی نییە بەڵکوو کاتەکەی پێ گونجاو نییە. بەڵام ئەگەر کرا، دیسان هەمان ئەمریکا هەوڵدەدات لەنێوان هەولێر و بەغداا بێت و وابکات نە شیشەکانی بسووتێن و نە کەبابەکەی. مەکگورک جێبەجێکاری سیاسەتی ئەمریکایە بۆ کوورتمەودا و زۆریش حەزدەکات ببێتە قاسم سولەیمانیی ئەمریکا، بەڵام ئەوانەی دەزانن کوردستان بۆ ئەمریکا چ قازانجێکی هەیە زۆر لە مەکگورک گەورەترن. بۆیە لە هەڵوێستی ئەمریکا نیگەران مەبن و بزانن پاش گشتپرسی بەدڵی کوردستان دەبێت.
=KTML_Bold=رووسیا:=KTML_End=
بێدەنگیی ئێستای بۆ کوردستان نرخێکی زۆری هەیە. ئەوان کەمترین هێلکەیان بە شڵەقانی ئێراق دەشکێ و بەپێچەوانەوە دەوڵەتە ئاییندەییە بچکۆلەکانی کوردستان و ئێراقیش باشترین نێچیرن بۆ ئەوەی ڕووسیا بەروبوومی پاش هەڵەی ئەمریکایان تێدا بچنێتەوە. ڕۆزنەفت ئەمە باشدەزانێ بۆیە کاتێک هەموان دەترسن، وەبەرهێنان لە کوردستان دەکات. باڵیۆزی ڕووسیاش لە بەغدا ئەوە دەزانێ، بۆیە دەڵێت ڕێز لە بڕیاری خەڵکی کوردستان دەگرن ئەگەر بڕیاری سەربەخۆیی بدات _ پار ئەم قسەیەیکرد.
=KTML_Bold=بەغدا:=KTML_End=
لەژێردەستی شیعەدایە، بەڵام شیعەش یەکدەنگ نین. هاشمی شاهروودی، کە وەک جێگرەوەی خامنەیی دەناسرێت، لە ڕۆژانی ڕابردوودا هاتە ئێراق. ئەو پیاوە لە نەجەف لەدایکبووە و لەوێش خوێندوویەتی. دامەزرێنەرێکی جووڵانەوەی بەرهەڵستیکارانەی شیعەکانی ئێراقە و کۆتایی حەفتاکان چووەتە ئێران. شاهروودی بە هەموو هێزی خۆیەوە نەیتوانی نێوماڵی شیعە لە ئێراق ڕێکبخات و هیچ مەرجەعێکی شیعەی ئێراقیش پێشوازیی لێنەکرد. نائومێدانە گەڕایەوە ئێران. ئەو هەرا و زەنایەی دژی کوردستان لە بەغدا هەیە شیعەی مالیکی و ئەوانیدیکەی سەر بە شاهروودی و ئێرانن دەیکەن. عەبادی ناچارە هەڵوێستی وابێت و سەرۆکوەزیرانە و هەڵبژاردنی لەپێشە. موقتەدا کە لەژێر هەژموونی ئێراندانییە هەڵوێستی تووند نییە. شیعەی سەر بە ئێران لە کاژێرەکانی داهاتوودا هەموو هەوڵێک دەدەن گشتپرسی نەکرێت. دوای ئەوە بانگەشەی هەڵبژاردن بە سنگ کوتان بۆ یەکپارچەیی ئێراق دەستپێدەکەن. خراپترین شت کە ڕەنگە ڕووبدات ئەوەیە کە مالیکی پاش گشتپرسی کودەتا بکات. ئەمەش دووشەشە بۆ کوردستان!
=KTML_Bold=دۆستەکانی کوردستان:=KTML_End=
فەرەنسا و سعودیە و ئیسرائیل و هەموو وڵاتانی دیکە بە ئەمریکاشەوە، بە سەرکەوتنی گشتپرسی شەرعیترین پاساویان لەبەردەست دەبێت بۆ ئەوەی پشتیووانیی خۆیان بۆ ئیرادەی میللەتێک پیشانبدەن. چونکە ئەمە بنەمایەکە کە نەتەوە یەکگرتووەکانی لەسەر دامەزراوە و کەس ناتوانێ ڕەخنەیان لێبگرێت کە ڕێزیان لەو بنەمایە گرتووە.
=KTML_Bold=نێوخۆی کوردستان:=KTML_End=
کاژێرەکانی داهاتوومان قوورس دەبن. دڵەڕاوکێمان بۆ درووستدەکەن و هەوڵدەدەن پەشیمانمان بکەنەوە. لەنێو حیزبەکاندا سەرکردە هەڵدەکەون کە دەترسێن و نایانەوێ بەشداربن لەم چرکەساتە مێژووییەدا. لە کۆتاییدا ڕۆژی دووشەمە لەخەو هەڵدەستین و دەچینە سەر سندووقەکانی دەنگدان یانیش دەچین ئاهەنگ دەگێڕین کە شتێکی باشتر لە گشتپرسیمان دەستکەوتووە. [1]