سیاسەتو بەڵشەویکا وەراوەر بە کوردی
نویستەی: دکتور ئەفراسیاو هۆرامی
سیاسەتو بەڵشەویەکا وەراوەر بە کوردی، سنوورو گرد داب و نەریت و ئەخلاقێ ئینسانیش بەزنان.
کەسایەتیی نامدارو کوردی بە نامۍ (کامیل بەدرخان) ، کە میرو شازادەیچشا پەنە واتەن، جە بنەماڵەو بەدرخانیەکان، سەرەتاو جەنگی جەهانی یەکەمۆ تاکو ساڵەو (1923ز) جە ڕووسیانە ژیوان، پا ئومېڎەی بەشکوم سەرنجەو ڕووسیای پەی گرفتو کوردی بکېشۊن، وېش و بنەیانەکەش خزمەتێ فرەو دەوڵەتو ڕووسیایشا کەردەن، دلۍ بەڵگەنامەکانا ئامان کە کۊششێ فرەش کەردەن پەی بەدەس ئاوەردەی کۊمەکو ڕووسیای.
وەلێ داواکاریەکېش، بە بەهانۍ بۍ مانێ و دروۍ و پەیمانۍ بۍ کەردەوۍ، وزیێنۍ پەشتەو گۊشا، تەنانەت خیانەتیچش وەنە کەران.
حکومەتو ڕووسیای دەستوورێ نامەردانە مدۊ بە بەرکەردەیش دلۍ ڕووسیاینە و نەگېلایۆش پەی ئاگەیە، ئیتر کامیل بەدرخان جە دەسەڵاتدارا ڕووسیای نائومېڎ مەبۊنو پەیش بەرمەگنۊ کە هیچ هەرمانێ پەی کوردی نمەکەران، وېش داواکەرۊن ڕووسیای جېیابازۊن، نەک تەسلیمو تورکېیایش بکەراوە، ساڵەو (1923ز) بە دەسی بەتاڵ ڕووسیای جېیامازۊ، هەر چا وەختەنە (شېخ مەحموود) ی حەفید نامەیوە مەکیانۊ پەی دەسەلاتدارا سۆڤیەتی پەی کۊمەک کەردەیش، مەشۊم چ وەفێوەشا پەی شېخ مەحمووڎی و گرفتو کوردی بۊنە بېجگە گەمەکەردەی بە مافەکاش.
ئا سیاسەتەو بەڵشەویەکا کە سنوورو گرد داب و باوێ کومەڵی و ئەخلاقی ئینسانیش بەزنان، چەنی سیاسەتو هیچ ڕژێمێ وەراوەریۍ نمەکریۊ.
دکتور ئەفراسیاو هۆرامی
کورد دلۍ ئەرشیڤو ڕووسیا و سۊڤییەتینە.[1]