پەیلواو سۆڤیەتیەکا دەربارەو گرفتو کوردی:
بەڵگەو ژمارە (1) ی، تاریخو (23/12/1946ز) دەربارەو گرفتو کوردی:
ئی بەڵگە کە پەیلوای و سیاسەتو ڕووسیای سۆڤیەتی، یانی جە وەختو ئامای سەرو حوکمو بەڵشەویەکا ساڵەو (1917-1941ز) وەراوەر بە گرفتو کوردی:
ئېمە (سۆڤیەت) گرفتو کوردی بە کېشێوە بەین نەتەوەیی نمەزانمۍ، بەڵکو بە کېشێوە وېدلەیی ئا وەڵاتا مزانمۍ کە کوردشا چەنەن، ئۆتۆنۆمی یان دۆڵەتی سەربەوېیی پەی کوردەسانی ڕەڎ کەرمېوە، سایەو هەر لایەنێنە بۊ ئېمە زدش مدرمۍ.
یانی بەڵشەویەکۍ زددو هەر هۆڵێ بەین دۆلەتی بېنۍ پەی چارەسەرو گرفتو کوردی، بە ڕەفتاریچ سەلەمناشا، پاسەبۊ هیچ جېیاوازیێشا نېیەن چەنی داگیرکەرا کوردەسانی، ئاڎیۍ دژو ئۆتۆنۆمیچەنۍ گەر چوارچېوەو دۆڵەتە داگیرکەرەکا کوردەسانیچەنە بۊ، چوونکوم ئا ئۆتۆنۆمیە دماڕۊنە ملۊ پەی سەربەوېیی و کوردەسان مەبۊن بە پاگێوە ئیمپریالیزمی دژو ڕووسیای، ئا وەختە ئیمپریالیزم جە کوردەسانۆ دەسش مەیاوۊن ئاسیای مېیانی و نۆتەو سەرنیشتی.
جە عەینو وەختینە شالیارو بەری (وەزارەتو خارجی) داوا مەکەرۊن ئەو فەرمانبەرەکاش بە هیچ کلۆجێ نازان خېڵە کوردەکۍ بە دەسو فارسەکا و تورکەکا چەک کریان، چوونکوم ئاڎۍ جەنگ کەرۍ خاسېنۍ و وەختو پەنەۋازینە پەی دژایەتی تورک و فارسی بەکارشان بارمۍ، داواکەرۊن ژڵېویەو ڕزگاریوازو کوردی پەی دژایەتی کەردەی ئینگلیزەکا بەکارباران.[1]