تاڕادەیەک تورکیا و ئێراق گەیشتوونەتە لێکتێگەیشتنی سەرەتایی بۆ دەستپێکردنەوەی هەناردەی نەوتی هەرێمی کوردستان و ئێستا بەربەستی بەردەم ئەو پڕۆسەیە لایەنی ئێرانییە.
لە ئەنجامی گفتوگۆکانی دوو هەفتەی ڕابردووی نێوان لایەنی تورکی و ئێراقی، بەغدا و ئەنقەرە گەیشتوونەتە لێکتێگەیشتنی سەرەتایی بۆ دەستپێکردنەوەی هەناردەی نەوتی هەرێم.
هەردوولا ئامادەکاریشیان کردووە بۆ ئەنجامدانی ڕێککەوتن لەبارەی دەستپێکردنەوەی هەناردەی نەوت و لەسەر ئەوەش یەکللابوونەتەوە، کە بەغدا و ئەنقەرە سەرپەرشتی دەرهێنان و هەناردەی نەوت بکەن بەپێی ئەو ڕێککەوتنەی لەنێوانیان واژوو دەکرێت.
ئێستا ڕێگری گەورەی بەردەم دەستپێکردنەوەی هەناردەی نەوتی هەرێم لایەنی ئێرانییە، کە نایەوێت وەک پێشوو تورکیا سوودمەندی گەورە و یەکەم بێت لە هەناردەی نەوتی هەرێمی کوردستان. [1]