تەماحە قڼگەو پېیای دڕۊ
مروڤ کائینێ تەماحیەن، خوڎای پاسە وەشکەردەن، شەرت نېیەن تەماحە تەنیا پەی ماڵوو دنیێ بۊن، بەڵکوم بڕێ تەماحۍ هەنۍ تەندرووسېنۍ، تەماحە پەی زانیاری، پەی فېربیەی، پەی یاوای بە پلێوە باڵای، پەی خوڎا پەرەسی،...هتد.
ئی تەماحۍ ئینسانی مەیاونا بە پلێوە بەرزی ئایینی و کومەڵایەتی، سوودشان پەی کەسەکەی، هەم پەی خەڵکی فرەن.
ئانەی چی پەندېنە واچیان مەخسەڎش تەماحەی مادیەنە، تەماحەو ئینسانی پەی زەڕی، ماڵو دنیێ، کە فرەو جاری کەسی تەماحی مەگنۊوە دلۍ کەڼاوێ کە بەرئامایۆش زەحمەتەن.
کە واتەنشا قنگەو پېیای دڕۊ، یانی تەماحەی فرۍ ئینسانی مەکېشۊ پەی گرڎ یاگێ، ڕەنگە بەرۊش پەی یاگێ کە نەک ماڵەکەش، بەڵکوم کەسایەتی و قیمەتیچش دەسەنە بڎۊ.[1]