بەریتانیا قڕو یەزیدیەکاش بە جینوساید ئەژناسا
نویستەی: #د. ناجح گوڵپی#
وەڵاتو بەریتانیای دڎانش نیا قڕکەردەی یەزیدیەکارە پیٛسەو کەردەو جینوسایدی. هیزی (01-08-2023) وەڵاتو بەریتانیای قڕ-کوشتارو یەزیدیەکاش بە فەرمی ئەژناسا هەکە کەردەوێوە جینۆسایدین و بە مەبەستو دلیٛنەبەردەی گیریانەنە وەر دژو ئا مەردمیە کە ئایینشا یەزیدی بیەن جە شارو شەنگالی پاریٛزگاو نەینەوای-موسڵی کە جەلاو داعشیوە ئەنجامدریان. ساڵەو پاریچ وەڵاتو ئەڵمانیای و وەلتەریچ وەڵاتو هوٙڵەندی کوشتارو یەزیدیەکاشا بە جینوٙ ساید نیانرە، هەرپاسە نەتەبە یوٙگیٛرتەکیٛ و یەکیەتی وەڵاتانو ئەوروپای ئی کوشتارشا بە جینۆساید ئەژمار کەردەن دماو وەنە قومیاشا.
قڕکەردەی یەزیدیەکا جە ویەرو تاریخینە یاوان حەفتا و چوار جاریٛ، دماجارشا ساڵەو (03-08-2014) بیٛ کە سەوای ساڵیادشەن، نوٙساڵیٛ چیٛوەڵی بېیەن، جە لاو داعشیوە بەهامکاری بڕێ لایەنی تەری هەمدیسان جینوٙسایدکریێ، چی هەڵمەتەو قڕکەردینە زیاتەشش هەزار کەسیٛ زیندە بەچاڵیٛ کریێ، یام کوشیێ، یام ئەرفانیێ بەتایبەت کناچە و ژەنەکیٛشا، کوڕیٛ و پیێ گردشا کوشتیٛ یام وستیٛشا چاڵەی قوڵەو بەخاک پوٙژنېشارە، تاکو ئیسەیچ نزیکەو (2000) هەزاریٛ ژەنی یەزیدییٛ بیٛ سەرو شوٙنەنیٛ کە پیٛسەو دەسکۆتیٛ بەردیٛنیٛشا، هەرپاسە هەڵای فرێوە جە یەزیدیەکا نەگیٛڵێنیٛوە سەرو ماواو مەسکەنو ویٛشا، ئاواریٛنیٛ، زیاتەر جە (120000) سەدو ویس هەزارا سەرەو ویٛشا هوٙرگیٛرتەن ڕوە هەندەرانی.
ئی هەوالمە پەوچی زاق کەردەنوە ۋەرو ئانەیەەە بپەرسو وەشڵەی چی هەڵای ئی گرد کوشتارو قڕکەردەیە مەیوٙ ملو (کورد) یرە هەڵای هیچ وەڵاتێ دڎانش نەنیان پوٙرە. کورە بوٙ سەرەت نەماسوٙ تاکو خایتێ پەرلەمان کڵیٛس بیەکەو ویٛچشا هەر دڎانش نەنیان پوٙرە. من خاس نونگەکەیش مزانو، چوون کورد ویٛش بەشدارەن جە ویٛقڕکەردەکەیش، هەر جە کیماوارن و ئەنفال... تاکو مېیاووٙ جینوسایدو یەزییەکا. ئەر بدریوٙ دادگا مشوٙ هەمدیسان حەیاشا بشوٙ و ویٛچشا دادگایی بکەرانیٛ بکوشاشا، پەوکای هەر تەقەلا مدانیٛ ویٛرو ویٛشا و خەڵکیش ببەرانیٛوە. با ئانەیچ بزانمیٛ ئەر یەزیدیەکیٛ ویٛشا پیٛسەو کوردی دێقەڵەم سەرو ئاستو جەهانی پیٛسەو کوردی وزیٛنیٛشا پەشتەو کەنوٙڵا، نونگەش ئانەن ویٛشا پسەو ئەتنیکێ ئاینی هەرپاسە غەیرە کورد دان قەڵەم. [1]