دار ماچۊ تەۋەر گەر دەسەش جە وېم نەبۊ، نمەتاوۊ بڕۊمۆ

تەۋەر ئامرازێ دار بڕیەی و دار کەردەیۆن، دەمەکەش پارچە ئاسنێ دەم تیژەن، دەسەکەیچش جە داریەن.
پېسە واتمان دەسەو تەۋەری جە داریەن، چوونکوم دار سووکەن تەوەرەکە بە ئاسانی گېریۊن و شانیۊن، بەڵام گەر دەسەکەش ئاسن بیێ، ئانە تەۋەرەکە فرە قۊرس بۍ، فرە بە زەحمەت شانیۍ.
پېسە پەندێ بەکارئامان پەی وۍ وەری و خېیانەت جە یۊترینی کەردەی.
دژمەن هەرچن بە هېز و بە تەدارەک بۊن، هەرچن پۊشتە بۊن، بەڵام وەردەمو ئیرادەی پۊڵایینو خەڵکینە مەلەرزۋن، مەگنۊن، بەڵام دژمەن پەی زاڵ بېیەی تاکتیکێ تەر بەکارمارۊن، ئاڎییچ وەشکردەی تەفرەقە و دوە بەرەیی مېیانو خەڵکینە، سێیاسەتو دەسە تەۋەرەکەی بەکار مارۊن، بڕێ کەسۍ مسانۊن بە تەماعەی مادیە، یام تەماعەو دەسەڵاتی کە دلېنە بە گرڎ ئامرازێ پەلامارەو هېز و دەسەڵاتو میللەتەکەو وېشان بڎان، بە هاندای خەڵکی زدشان، بە وەڵاکەردەیۆ پاگەندا پەی وڕنای ورەو خەڵک و چەکدارەکاشا، ئانۍ پېسەنۍ دەسەو تۋەری، کە میللەتو وېشان بڕاوە.[1]