ڕۊ گەردوونی هەرمانکەری
ڕۊ گەردوونی هەرمانکەری جە گردلایە، بە تایبەت جە هەرمانکەرا موبارەکبۊ.
هەر چن ئی ڕۊوە فرەو جارا بە ڕۊ گەردوونی هەرمانێ، یان هەرمانکەری ئەشناسیان، بەڵام جە ڕاسینە مشۊ واچمێ ئی ڕۊوە هیشتا ڕۊ ئەوەگژیاین پەی مافوو هەرمانکەری. هەر چن ئی ڕۊوە (134) ساڵێ وېیەردەش هەن و چا وەختەولای تاکو ئیسە هەرمانکەرۍ بۍ وچان پەی بە یاسایی کەردەی و چەسپنای مافە ڕەواکاشا گژیاینێ و ئیسەیچ هەر گژیا، بەڵام هیشتا ئی مافا بە ئاشکرا پاشێلێ کریا و فرێچشا هەر پەسەنِڎێ نەکریاێنێ. ئینەیچ گېڵۆوە پەی ئا ناداڎپەروەریە کۊمەڵایەتی و ئابووری و... کە جە گردو وەڵاتاو دنیاینە وجووڎش هەن و تاکو ئیسە بۍ چارەسەر مەنەنەو. ئی ڕۊوە ئیمساڵ کەوتەن دلێ باروودٶخێو تایبەتی کە قەیرانەو کۊرۆنایش نامۍن و کریۆ واچمێ جە تارێخوو مرۊڤایەتینە بۍ وێنەن. ئەوەگژیای پەی ئا مافا کە (134) ساڵێ چیوەڵتەر دەسش پەنە کەرد و بڕېوەشا چەسپیاێ، ئیسە جە سێوەروو ئی قەێرانێنە کەوتێنێ لێژایی و خەتەروو فۆتیایشا هەن. ئەوەگژیای پەی چەسپنای (8) سەعاتێ هەرمانێ و (8) سەعاتی وەختێ ئازاڎی و (8) سەعاتی وتەی جە فرەو وەڵاتانە پەسەنڎ کریابێ. ئیسە وێنمێ کە تەنانەت جە وەڵاتە ئۆروپایەکایچەنە ئی (8) سەعاتە جە بڕېو چا هەرمانگایانە کە پێونڎیشا پی قەیرانێوە هەن، بە نامۍ باروودۊخێ قەیراناوی، کریان بە (12) سەعاتێ. ئیە زەنگوو خەتەرین پەی ئا مافا کە چینوو هەرمانکەری بە دەیان ساڵێ پەیشا گژیابێ و بە دەسش ئاردێبێنێ.
موختار کەریمی.[1]