ئا کناچە عالۍ کە ڕۊمانوو چنارەیش واناوە کېنە؟
نزیک بە ساڵێو چېوەڵتەر بۍ و دماو چاپوو ڕۊمانوو چنارەی، شەوۍوە پەیامێوم پی جۊرە پەی ئاما.
سڵام کاکە ڕەزا، بوەخشە مزاحمتان مەو، ئەمن نامۍم کانیا سیافیەنە، خەڵکوو پاوەیەنان، ڕۊمانەکێتم واناوە، فرە حەزم پەنە کەردە، ئەر ئیجازە فەرماودێ گەرەکمەن دەنگو وېمش بووزوو سەر و کەرووش بە کتێوێوە سەوتی.
وەختێو پەیامەکەم دی، شێوەو ئەدەب و نەجابەتێو کە دلێ نویسەکەیشەنە بێ، هەر یۆوەم واچەشەنە، گرتاش.
کۆتا ویڕوو ئانەیە کە ئی خانمێ مشیۊ لانی کەم پەنج و شش ساڵێو چېوەڵتەر، هۆرامی وانای و هۆرامی نویسەیش دەس پەنە کەردەبۆ و هەرپاسە سەوادېوی خاسیچشبۊ، تاکو بتاوۆ پاسە بنویسۆ.
دماو چن پەیاماتەری کە بەینمانە ئامێ و لوێ، پەرسام چەنە:
کاروو دیکلەمە و دەنگ وەش کەردەی چکۆ فێرە بیێنی؟
ماچۊ:
کاک ڕەزا ئەمن (14) ساڵێمەن، مەدرەسە مەلوو، هەر وېم فێرە بیێنان، دلێ ئەنجومەنوو گرنگەی و تریفەیەنەیەنە جار جار پەی دیکلەمەی تەمرین کەرۍنمێ، بێجگەم ئانەیچە ئەلاقەم بە شێعر واتەیچ هەن، دوێ شێعرێم دلێ کتیوو هام فەردانېیەنە چاپێ بېیېنۍ.
ڕاسەکېش وەختێو ئیەشە وات، فرە سەرسام بېیا! چەنی کریۆ کناچېوە (14) ساڵێ ئاندە ویر بەرزە و بە توانابۊ. دمایی زانام کە خاتوو کانیا واڵەزاو کاک ئارام موستوفییەنە.
ئی خانەوادە، پەی فرەو خەڵکوو هۆرامانی ئەژناسیێنێ. فرێشا ئەهلوو شێعر و شاعێری و ئەدەبېیەنێ.
پا جۊرە خاتوو کانیا دماو ئەرکێوی فرەی، ڕۊمانوو چنارەیش کەرد بە دەنگ. ئی دەنگێ جە گردو ڕۊمانەکەیەنە بە بۍ هیچ سەکتێو ماچیا و ملا وەرۆ. بێجگەم ئانەیچە هۆنەرێوی بۍ وێنەش جە بەینوو واتەکانە خۆلقنان، کە گۊشگیری بەرۆ چەنی وېش و ئا یاگێ کە پەنەوازا شادەبۊ، شادەنە. ئا یاگێچە کە؛ خەمبۊ، یا سەرسامەبۊ، فرە بە ڕېکی ملۆ چەنی دەقەکەی. فرەو فراوان دەس وەشیش چەنە کەروو، وەشحاڵەنا کە هۆرامان کەسانېوی پېسەو خاتوو کانیایش چەنە هۊر کەوتێنێ.
ڕەزا بەهمەنی.[1]