چی مەشۊم ڕۊمانەو (چنارە) ی بوانمېوە؟
بەشۍ: حۆتەمە
نویسەر دلێو چنارەینە بە زەریفی و ڕیک و پێکی ژیوایو تاکی هۆرامی جە وېیەردەنە ڕەوایەت کەرۊ پەی وانەری. حاشاش مەکریۆ چەنە کە هەمیشەی ژیوای هۆرامیەکا دلێ گردو کوردستانینە فرە جیاواز بېیەن. جیاوازیەکەش ئینا چانە هۆرامیەکێ شۆرەتشا بېیەن بە دەس ڕەنگینی و ئازایی و پانەی کە موحتاجوو هیچ کەسی نەبېیېنۍ. هەرچیوشا گەرەک بیەبۆ، ئەر دنیایچشا دێپۆ پوهور وېشا وەششا کەردەن. یۊ جە ڕەنجەکاو تاکی هۆرامی وېیەردەنە کەم دەسی بېیەن و سیستەم بۊنەو پەراوێز کەوتەی هۆرامانیوە هیچ وەخت پاجۊرە کە مشۊ و مەبۊ_ن نەپەرسانشۆ پەی ئی مەحاڵی. ئی خاڵێ هەر ئیسەیچ تاومۍبە ئاشکرایی وینمێ. هۆرامیەکێ هەمیشەی ئەهلوو قەناعەتێوە بۍ ۋېنەی بېیېنۍ و بۊنەو ئانەیوە کە جوغرافیاو هۆرامانی نزیکوو سنوورەکان، دایېمە یۊ چا ڕەنجە هەمیشەییاشا دیاردەو کۊڵبەری بېیەن و ئینەیچ چنارەنە دلێو ژیوای کەسایەتیېوەنە پېسەو ئەنوەری یا سابیری وینیەیۆ. هۆرامیەکێ هەر ئێننە کە تیکێ نانە وشکە وېرەگا سەرو سفرەکەیشاوەبۊ، قەناعەتشا پەنە کەردەن و هەر بە مڵک و باخېوە کەم و کاسبیېوە کە نازۆ مرا، ڕازیێ و قانێعێ بېیېنۍ. سەرەڕاو ئینیشا، دلێو وېشانە هەمیشە پشتیوانوو هەنترینی بېیېنۍ و تاکو هەم زوان و هەم دەگایېوە قۆمابۆش وەنە، ئانە ئیتر گردو دەگای قۆمیانش وەنە و بە خەمیش خەمبارێنێ و بە وەشحاڵیش ڕازیێ و سەروەشێ.
فەرشید ڕۆستەمی.[1]