زوانی ئەڎایی مەبارەکا
نویستەی: #سابیر عەزیزی#
زوان کۊڵەکێ ڕۊحی و ویر و ئەندیشەینە، جە ڕاو زوانیەوە ویر وەشبۊ وبۊ بە عاسا و گۆچانە پەی ژیوایە پەڕ جە کامەرانی و وەشبەختی. دیارا جە عەقڵیەتوو سەردەمینە زوان جیا جە ئەرک و ڕۊڵوو پێوەرە بېیەی و ئێرتێباتی، چراوێنە پەی کێبېیەی و ئەشناسەو نەتەوەکا. تاکو زوانەت نەبۊ و ئەپی زوانەیە پلان و بەرنامە پەی ژیوایت نەمجیرە، مەتاوی بیەو وېت تۆمار کەری و دەنگ و هاوارت یاونی لاو گۊشگیرا.
زاڕۆڵە بە دەنگ و نەواو ئەڎاو وېش لایەلایەش پەی کریۆ و پا زوانە ئەڎاییشە گۆچ کریۆ، بنەما و فنداسیۆنوو زوانی ئەڎایی جە مەژگشەنە مجیۊرە و هێقمبۊ.
بە داخەوە جە وڵاتە فرە زوانیەکانە دایېم لاو دەسەڵاتداراوە یەک زوان بوڵت کریانەوە و بېیەن بە سنتەر و باقی زوانەکا کەوتێنی پەراوێز.
جە وڵاتە وەڵکەوتەکانە وەشبەختانە ئی کۆسپېشا لا بەرڎێنێ و بەهاشا دێنە بە زوانی ئەڎایی و جۊرێ پلان و بەرنامە جە لاو پەروەرڎەیوە مجیانەرە کە زاڕۆڵە تاکو کەلاسوو هەشتی بە زوانی ئەڎایی وېش دەرس وانۆ.
جیا چینەی کە وانگا و قۆتابخانە تاوۆ ڕۊڵ و نەقشی کارامەشبۊ جە پەروەرڎەو زاڕۆڵەکاو وڵاتوو وېشەنە، پەی کەسێ جە وینگای کەسایەتی و شەخسیەتی فەردی و تاکیوە کە دووربۊ جە زوانی ئەڎایش، شێواز و حاڵەتی نەرینی جە ڕەفتار و کرڎارشەنە ڕەنگ وبۊ مدۆوە و دایېم پەی فرسەتێ گېڵۆ قەرەبوو ئا کەم کۆڕیەیە کەرۊوە، تەنانەت نۆعێ خشونەت و تەند و تێژی جە ڕەفتارشەنە دیار وەرچەما و ئینە کریۆ جە بازنێ وەروەڵاوتەرەنە دڵێ کۊمەڵگاینە ئی ڕەفتارێ پیویا و بە شێوازێ ئەمنیەت و ئاسایېش و ئاشتی، هەڕەشێش چەنە کریا.
پەنەوازا عەقڵیەتوو ڕۊی و ئەندیشەی سەردەمیانە ئەو پەڕوو بەها و ئێژای بنیۆرە پەی زوانی ئەڎایی و بە چەمۍ حورمەت و وەشەویسی تەماشەو گرڎوو زوانەکا کریا، چوون هیچ زوانێ جە زوانێتەری کامڵتەر و عالتەر و مل بەرزتەر نیا، گرڎ زوانێ جە حەنناو وېشەنە دەسەڵاتش هەن و پەنەوازا بە چەمی بەرز و یەک ڕېزەوە تەماشە کریا.
پا ئاواتە ڕوێ بۍ وەرەوە هیچ زوانی هەست بە پەراوێز کەوتەی نەکەرۊ.[1]