حەمە ژەنی مارۊ
بەشۍ: ششەمە
ئەوەڵ شەو:
حەمە ۋەیۋە مارۆ یانە!
جە بەشوو ئەوڵیەنە واتما: حەمە چەنی کاکە ڕەحیمیش گنا قسە کەردەی و کاک ڕەحیمش باسوو کناچېوېش پەی کەرۊ بە نامۍ وەنۊشێ کە تاکو ئیسە حەمەی نەڎیێنە. داوایچش وەنە کەرۊ حەمە کناچەکێ بارۆ وبۊ بە ژەنیش، حەمەیچ جە جوابوو قسەکا کاک ڕەحیمیشەنە، واتش:
یانی کاکە ڕەحیم، ئیسە تۊ ماچی دڵداری مەکەرە و هەڕەمە بنیشە مل و نەڎیە و نەژناسیا کناچېوە بارە یانە؟ دەی ئانا جارێویچ چەنیت ئامانێ پەی سۆسەکانێ و دوورۆ وەنۊشەم دیە، ، ئیتر پا کوچەو دیەیە، گرد چېوم تەماما؟
کاک ڕەحیمم تەمادار نەبۍ من پاسە جوابش دەوۆ. ڕاسەکێچش ئانێ بێ، قسەکێ من فرە زلتەرێ بێنێ جە عەمرەکەیم. ئینەیچە سەبەبەکەش ڕەفێقەکێم بێنێ کە هەمیشە چا قسە و باسا فرە پێوەرە کەرۍنمێ.
ملېوش لار نېیا و خاس دیاوە قەد و باڵایمەرە، هۆرسۆ و گېڵاوە پەی لا کۆگاکێ.
چا ڕوۆ کاک ڕەحیمیم باسوو وەنۊشێش پەی کەردا، هەر وېمۆ وەنۊشە کۆتەنە سەرەم. دلێ خیاڵا وېمەنە وەنەوشێوەم پەروەرنا، بە بۍ ئانەیە تاکو ئیسە ئی کناچېمە دیێبۊ، چەمۍش و ڕوەش و قەڎ و باڵاش، وەروو چەمامۆ بێ. پېسە پەیکەر تاشێوی کە پەیکەرەکەی وەڵێنە دلێ خیاڵیشەنە وەش کەرۊ و ئیجا تاشۆش، منیچ جە ویروو وېمنە وەنۊشەم وەشە کەردە و تاشام.
هەرچی ڕوەکێ زیاتەر لوێنێ، ئێرق و مەراقم پەی دیەی وەنۊشێ فرەتەر بێ. وېرەگانێو تەماتەکەما چنیۆ، کاک ڕەحیمم ماچۊ سەوای پێوە ملمێ پەی تەۋېڵۍ و چاگەیچۆ ئەر کریا سەرێوو سۆسەکانێچ مدەیمێ.
ئا شەوە وەشیێنە تاکو دێرێو وەرمم نەکۆت پۊرە. چەنی شەبەقی هۆرسیمێ و بارە تەماتەما یاونا مێڎانوو تەۋېڵۍ و نان و چای سەحبیما بەرد پەی سۆسەکانێ یانەو مەتیێم.
مەتی شەمعێم ماوێو بۍ منش نەڎیەبێنێ، هەر دوورۆ باوشیش کەردۆ و ئاما پێوایمۆ. پېسە ئەڎێیم قوربان و سەدەقەم بۍ و شێعرێ چنێ باڵامەرە: قوربانش بو کوڕە شیکە عالەکەم، ئانا دەسە گوڵېوەم پەی ئیسەنۆ بخوڎا ئا دەسە گوڵە هەر لایێقەو تۆنە!
ئی قسا ئەژنەوێنێ و گەز گەز باڵا کەرۍنێ، مەتی شەمعێم زانێ من تایبەت لوانا ئاگە تاکو وەنەوشێ وینوو. هەواڵوو شەرمینێ کناچېش پەرسام، جوابش داوە و واتش: وەڵا حەمە گېیان نېیەنە چېگە. ئارۊ سەحبێ چەنی ئەمینی شویش لوێ پەی تەۋېڵۍ و کوڕەکەشا لا منۆ ئاستەن جیا.
ڕەزا بەهمەنی.[1]