هۆرامی، زوانی هۆرامی یام بېکەسی؟
بەشو: دوۍ
دەیان هۆرامی زوانۍ وەش زەوقێ شاعێری ونویسەرێ و فیلمسازی و ئاهەنگسازی پەڕ بە دڵ کەوتێ ڕاو ژووژنایۆ زوانی هۆرامی، بەڵام ئڼە درۋۍ و دوە ڕوویی و نفاق وخیانەت و بۍ موبالاتی و بۍ حیمایەتیشا جە خەڵکە دەسەڵات دارەکەو هورامانی دی، گرد سڵشا کەردوو گېڵێوە شۆنەو خزمەت بە زوانی فارسی و سۆرانیرە ، من وېم تاکو بیس نەفەرێ مشناسوو واتەنشا تخا بە کێ خزمەت کەری بە خەڵکێ کە سیاو و چەرمەو شانازی و چېرە دەسی زوان بېیەی و نەبېیەی بېژگەم مەنفەعەتو وېش هیچ فەرقێش نېیا پەیش!
پەلەکەردەی جە هۆژمەو هۆرامان شناسی، بۍ بەرنامەیی و نەمەنەی زەوقو شەوقوو هۆنەرمەنداو زەحمەت کېشا هورامانی کە ئاڎییچ گېڵۆوە پەی کەمتەرخەمی جەماوەری و خەڵکوو هۆرامانی کە هیچ یاگێنە یۆشانەگېرتوو حیمایەتشا جە زوانی هۆرامی نەکەرد،
ئیسەیچ تاک وترووک چن یاگێنە بڕێ هەرمانۍ کەران، بەڵام بەداخەوە مەیاوا هیچ یاگێ.
من حەز کەرۍنا چی هۆژمێنە کە هۆرامیا ئاردێبێوە هەرمانېوە گەورە کریۆ، بەڵام بەداخەوە گردو ئانیشا کە بەڕاسی خەمەوەری زوانو هۆرامینی مەیاوا دوسەد نەفەرێ ماباقی تاکو کیسەشا پەڕ کەرد بیێ تەماشا کەرۍ وەزعەکێ و هۆرامانوو زوانو هۆرامانیشا وەردا.
من هیچ پەیامێم نېیا
فەقەت ماچوو زوانی هۆرامیچ تاوێ یۊ چا زوانابۊ کە جە کۊردەوارینە نامۍ بریۊ.
پابۊنەوە کە زوانی هۆرامی وېش سەدان زاروېش هەنێ و ئیسە ویش هەڵایی زاروەن و کەس بەزوانش مەشناسۆ وئەر زوانیچبۊ بەزوویی جە بەین ملۆ و حەر ماچا لەهجەو هۆرامی!
فەرید عەباسی. [1]