کتېبیانه و هەورامانی
بەشو: یەکی
کتېبیانه جە تەعریفی فەرهەنگ لۆغەتیشەنە بە ماناو یانه و کتېبان و یاگێوەن کە کتېبێ دلێشەنە پارێزیا. کتېبیانه یاگێوەن پەی هۆرگېرتەی و چەمڎاری کەرڎەی جە بەرهەمانێوی کە ڕۊزگاری قەڎیمەنە تاکو ئیسە وەشێ بېیېنۍ و مانەینێوە و مەخزەنێوەن پەی هۆرگېرتەی سەرچەمە هونەری و عێلمی و ئەدەبی و کۊمەڵایەتیەکا.
هەرپاسە کە مزانمۍ، عێلم دانشگانە تەولید بۊ و کتېبیانەنە پەروەریۆ و کۊمەڵگانە بە سەمەر مېیاوۆ. ئارمانجی گەوره و کتېبیانەی، بەرزەوە کەرڎەی ویر و ئەندیشه و ئێنسانەکان کە جە ڕاو گلێرەوەکەرڎەی، ڕاوەبەرڎەی و وەڵا کەرڎەی دانش و زانیاریەکا بە دەس مەی.کتېبیانه جە کۊمەڵگا جۊراوجۊرەکانە نەقشوو بانکی ئێتلاعاتوو دانش و ئەندیشەیش هەن. کتېبیانه میراسی گرانمایەو ئا نویسەرە زەحمەتکېشانە که دانشوو وېشا بە کۊمەڵگای و پەی خەڵکوو دماڕۆی ئێنتقاڵ دان.
کتېبیانە، کێبېیەی فەرهەنگی کۊمەڵگای
ئەشق و عەلاقەمەندی بە هەر چېوێوی، بۊ بە هۆو ئانەیە ئا چېوە جە وجووڎوو ئێنسانی یاگێ کەرۊوەو بۊ بە بەشێوی تایبەتمەند جە ژیوای ئا ئێنسانیە. پەی سەلەمنای ئی قسێمە گەرەکمەن چن مێسالێ باروەوە. مەسەڵەن وەختێو چنی وەرزشکارانێوۍ قسێ کەرۍ، حەتم باس، باسوو وەرزشیەن و ئەر بلی یانەو ئا وەرزشکار یا وەرزش دوسیە، مەوینی تابڵۆو یانەکەیش بە عەکسوو ئا وەرزشیە یا قارەمانوو ئا ڕەشتەیە وناریان، یام یانەش پەڕەن کەرەسێو ئا وەرزشیە پەس وجووڎوو ئا شەخسیە چنی وەرزشی تێکەڵ بېیەن. یانەو هونەردۆسیەنە عەکسوو گۊرانیواچی مەحبووبیش لکیانەرەو ئەر وېش هونەرمەندبۊ، حەتم ئامێرێ مووسیقایچ یانەشەنە هەنێ. ئینە پەی گرد سەلێقێوی سدق کەرۊ و بە ئېمە نیشانە مڎۆ کە ئی ئێنسانە چ نەوع شەخسیەتێوش هەن.
شەخسیەت و کێبیه و ئێنسانی فەرهەنگیچ بە کتېبیانه و یانەکەیش نیشانە مڎریۆ. بیەو کتېبیانېوی عال و فاخری پەی ئێنسانی فەرهەنگی، ئێفتخارێوی گەورەن.
ئەر ئی بابەتیە تەعمیم دەیمێ ملو کۊمەڵگایەرە، ماناش ئانێنە کە هەر کۊمەڵگایێو ساحېبوو کتېبیانېوی جامێع و فاخری بۊ، ئا کۊمەڵگا، کۊمەڵگایوی وەڵکەوتەن.
ئیبراهیم شەمس.[1]