سەفەریە پەی هەوارەڪەو بېسارانی
بەشۍ: یەکەمە
وەختوو چېشتەی، وەری داخ دابېشەرە و گڕە جە زەمینی بەرزە بیێبێوە. قسمەت پاسە بۍ نەختێو دێر گنمێ ڕا. گەرمی هەوای تاقەتوو زاڕۆڵاش ڪەم ڪەردەبێ. ڕاما بڕیە تاکو نزیڪی دەگای. دلێ دەگای چۆڵ و هۆڵ بێ. ڕۊخانەو دلێ دەگای بێدەنگ و بێ‌ڪشە بڕېو یاگێشوەنە ڪەرگەڪڕێت چەنە نیایاوە.
دلێ دەگایما ئاستە جیا و ڕوو بە هەواری ڪەوتێمێ ڕا. ئاخرین یانەو دەگاینە بوەو فێنڪێ هەواو هۆرای چڕەیما چڕێ. دار و درەخت پېسەو چەترێ سەرو جاڎەی خاڪیش گېرتەبێ و وەڵاتش ڪەردەبێ سێوەر.
دانەدانە هەوارەڪا جیا ئازێمێ. چەمېما تەژنەو تەماشای بێنێ. جاڎەو ڪەراخوو ڕۊخانەی دەسڪەن بۍ و شاڪەڵەڪێش و دیوارچنی تەوەنا دڵوو یۆی تازە ڪەرێنێوە. وەختێو تەماشاو ڪەڵەڪە بەرزەڪا ڪەرێنمێ دلێ دڵوو وېمەنە هەزار جارێ شڪوروو خوڎای ڪەرێنا و دەس وەشی ئا ئوسایە ڪه مانیایش پەی گرینگ نەبېیەن و تەنیا یاوەرش قوڵەنگەڪەش و پیڪ و نوێڵەڪەش بېیەن.
شێنەشێنەی ڕا بڕێنمێ. هەوار بە هەوار وەشتەر گنێ وەراچمەما. یاگش بێ، نزیڪ بە دە تاکو پانزە یانا بە یۆوە مەحەلێوەشا گېرتێبێ. قمێوە وەشە بە شەریڪی کە وەربەرەڪەنە بینایبېشا وەختوو هەرمانا و جل شتەی، تەشتە جلێ گېرێنێ دەسشاوە و جەمێ بێنێوە و شنیێنێ ڪاروو باری.
زاڕۆڵێچ وەروو بەرەینە یانەقۆڵێ بینێنێ. یۊ پەڕ بە دڵ ئاواتە وازێ چەنیشابۊ و وېش ڪەرۆ مێمانوو یانەی دڵە بۍ خەمەڪەیشا ڪە تەنیا دڵەڕاوڪێ و خەمشا ئانەن، یاخوڎا بزڵە یام و وەرێوە نەی بە ڪتووپڕ ڕاش گنۆ سمش بنیو سەرو بانو یانەڪەیشا و دارە ڕاڪەیشا خراو ڪەرۆ.
چەمېم نۆقمێ تەماشای بێبێنێ. چاگەنە جە گرم و قاڵوو شاری دوورە ڪەوتێبێناوە. ۋاچېنێ مەژگم مدران و فرمانش دان تەنیا ویروو ئی ساتەینە بە! فرە پەنەم وەش بێ. زاڕوڵێ وەش‌حاڵتەر جە وېما.
هاژەو ئاوێ گنێ گۊشاما و خەمێما بڕێ. یۊ حەز ڪەرێ چا یاگێنە جە هازوو ماشینەڪەی ڪەمبۊوە تاکوو سێوەروو دارە وەزەڪانە نیشیرە و شەڪەتی چن وەختا جە عەمری ویردەیت بڎەی دەمو ئاوەڪێوە و پەی هەمیشەی دەرەدماش بنیەی.
خانم ئەسرا شەریفی.[1]