تا بېنمۍ هیچ کەس نەزانۍ کېنمۍ

بنیاڎم تاقانە مەوجودێن کە داراو ئاوەزین، بەڵام هەرئی بنیاڎمە ئاوەزیش بەکارنمارۆ، تەماشەکەرە وەختێ ئاویرێ دورۆ وینمێ ئیتر نزیکش نمەگنمێ تاکو نەسۆچمێ، نزیکو ڕوخانە سورەی نمەگنمێ تاکو ئاوی نەبەرۆما، کەچی ئەر مەسڵەحەتێوە دونیاییما پەی ورگنۆ مڎەیمێ گژو دارو دیواریرە پەیش، جەوەختێوەنە چەنەما مەعلوما ئانەی خوڎای نەکەردەبۆ نسیبما پەنەش مەیاومێ. هەر پا مافیاتە قەدرو کەسە عالەکاما مەگېرمێ تاکو ئاوەختە کە مراو وەرچەماما گومێ با، دەی ئینە گردما زانمێش وەلێ کەسما مەچڵاکیۆرەو ئی هەڵەیە ڕاسکەرمێ.
من ماچوو ئەر مەردەی و شەهید کریای کاک ناسری سوبحانی کەلێنێ گەورێش وستێبۆ دلێ مەعریفەو زانست و ئیسلامی هەر پاسە مەرگ ومەڵڵا هەیاسی دڵناسکی شاعێرو لاو نەرم ونیانی خەسارەتێوە گەورەگەورە بۍ پەی ئەدەب وشیعرێ جە مەحاڵ وهۆرامانینە، بەدەر جە حەکیمیەت وخوایی وبڕیارو مەردەی کاکە هەیاسی، بەڵام من ئەجۊم جەمەحاڵێنە ئەرمەنێ سەڎایېوە گەورێش بۍ پەی فەرهەنگو هۆرامانی.
من ئەرچی شاعیرو شیعر شناس نېیەنا وەلێ شیعرەکاو هەیاسی فرەلامۆ جە شاعێرە کۆنەکا مەرغوب تەرێ بێنێ، چوونکم شیعرێ هەیاسی چەنی قوڵی مانێکېشاو بەقوەتی چنیایرەی وشەکاش فرە بەئاسانی گرد هۆرامی زوانێ چەنەشا یاوێنە، کە شاعیرە قەڎیمیەکێما تائیسەیچ دەیان ڕۊشناییشا وزیان سەرو وماناڎاریشا پەی کریان هیشتای یەکلانەبېیەنۆ مەبەستشا چېش بېیەن، پەی نمونەی لێکۊڵەرێ هۆرامانو ڕۊژهەڵاتی فەرماوۆ مامۊسا مەلا عەبدولکەریمی مودەڕڕیس نەتاوانش بەتەمامی شەرحەو شیعرەکاو مەولۊی ومەحوی و....تاد کەرۊ ، هەڵبەتە ئینە بەکەم تەماشاکەردەی مەرحوموم و م. مودەڕڕیسی نیا.
بەهەرحاڵ فەوتوو مامۊسا هەیاسی غەریبی کۆسکەوتەیێ گەورەبێ پەی گردیما و مەحاڵا پی زوانیە یاگەڎارش بەرگنۆ.
خوڎا جەوېش وئەڎاو تاتەیچش وەشبۆ پەی ئاخزمەتە گەورەیە کەردش بەزوان وفەرهەنگیما چا تەمەنە کەمەنە. نوور واڕۆ یاگێ ئاخرینەش. پېسە وېش فەرماوانش:
تا بېنمۍ هیچ کەس نەزانۍ کېنمۍ.
با بلمێ بەشکوم بزانا بېنمۍ.
د. عمر زەڵمی.[1]