بڕیاردەری بەشی ھەڵبژاردنی #پارتی دیموکراتی کوردستان# وتی: ئێمە وەکوو بەشی ھەڵبژاردنی پارتی پێمان وایە پڕۆسەی دەنگدانی تایبەت بەئارامی و بێ کێشە بەڕێوەچووە، تەنیا ھەندێک کێشەی تەکنیکی ھەبووە، ھیوادارین لە دەنگدانی گشتی چارەسەر بکرێن، چونکە ئەوەی گرنگە دەنگدانی گشتییە و خۆمان باش بۆی ئامادە کردووە و چاوەڕوانی سەرکەوتن دەکەین.
بڕیاردەری بەشی ھەڵبژاردنی پارتی دیموکراتی کوردستان، نیازی حەمە عەزیز، وتی: ھەڵبژاردنی تایبەت جیاوازی ھەبوو لەگەڵ ھەڵبژاردنی پێشوو، چونکە ئەمە تەنیا بۆ ھێزی ئەمنی و ئاوارەکان بوو، پێشتر زیندانییان و نەخۆشخانەکانیش بەشداربوون، بۆ ڕەوتی ھەڵبژادنەکانیش کێشە نەبووە و بەھێمنی بەڕێوەچووە ھۆکارەکەشی ئەوەیە ھەڵبژاردنی تایبەت زۆر کێشەی لێ درووست نابێت، بۆیە تەنیا کێشەی تەکنیکی ھەبووە و ئامێرەکانی دەنگ تۆمار دەکەن لە ھەندێک بنکە کێشەی ھەبووە ھەندێکی چارەسەرکراوە و بەشێکیشی مابوو.
نیازی حەمە عەزیز وتیشی: سبەی ململانێی بەھێز دەستپێدەکات لەدەنگدانی گشتی و ئێمە وەکوو بەشی ھەڵبژاردن باش خۆمان ئامادە کردووە و پەیوەندی بەھێزمان ھەیە لەگەڵ ئەو شوێنانەی کورد دەنگی لێ دەدات، بۆیە ئومێدێکی زۆرمان ھەیە کورد بەگشتی و پارتی بەتایبەت دەنگی باش بەدەست بێنێت و سەرکەوتوو بێت.
دەشڵێت: ئومێد دەکەین و داواشمان کردووە ئەو گرفتانەی لە دەنگدانی تایبەت لە ڕووی تەکنیکی ڕوویانداوە لە ھەڵبژاردنی گشتی چارەسەر بکرێن و دووبارە نەبنەوە. [1]