وەزیری تەندرووستیی هەرێمی کوردستان ڕایدەگەیەنێت، دەست بەسەر هەموو ئەو دەرمان و گژوگیایانەدا دەگرن کە لەنێو تۆڕە کۆمەڵایەتییەکاندا ڕێکلامی دابەزاندنی کێشیان بۆ دەکرێت.
بەیانیی ئەمڕۆ شەممە #23-12-2023#، بە ئامادەبوونی پسپۆڕان و بەرپرسانی تەندرووستیی هەردوو حکوومەتی ئێراق و هەرێمی کوردستان، کۆنگرەیەکی زانستی لەبارەی نەخۆشی قەڵەوی لە هەرێمی کوردستان و ئێراق، هۆکار و چارەسەرییەکانی لە #هەولێر# بەڕێوەچوو.
#سامان بەرزنجی#، وەزیری تەندرووستیی #حکومەتی هەرێمی کوردستان# لە گوتەیەکدا تکای لە هاووڵاتییانی هەرێمی کوردستان کرد، بڕوا بە پڕوپاگەندەکانی نێو تۆڕە کۆمەڵایەتییەکان، ئەوانەی ڕێکلام بۆ هەندێک گژوگیا و دەرمانان دەکەن، گوایە کێش دادەبەزێنن، مەکەن، چونکە هیچیان زانستی نین و لایەنی تەندرووستییان نییە، بەڵکوو خراپیشن.
وەکو ئەوەی وەزیری تەندرووستی باسی کرد، وەزارەتەکە دەستیکردووە بە ڕاگرتن و دانانی ڕێنمایی پێویست و دەستبەسەرداگرتنی ئەو جۆرە گژوگیا و دەرمانانەی لەنێو تۆڕە کۆمەڵایەتییەکان ڕێکلامیان بۆ دەکرێت؛ ئەوانە هەموویان دەرمانی زیانبەخشیان تێدایە و دەبێت بە ڕێنمایی پزیشکی بەکاربهێنرێت، نابێت هەر کەسێک لە خۆیەوە بەکاریان بهێنێت، چونکە زیان بە تەندرووستییان دەگەیەنێت.
بە گوتەی سامان بەرزنجی، کێشەی قەڵەوی، کێشەی هەموو تاکێکی کۆمەڵگەیە. دڵنیام ئەوەی لاوازە و تەندرووستییەکی باشی هەیە، سوپاسی خوا دەکات کە قەڵەو نییە و، ئەوەی قەڵەویشە چۆن بیر لەوە دەکاتەوە خۆی لاواز بکاتەوە. [1]