شەوەو گاوە سوورێ
بەشۍ: چوارەمە
خولاسە ئا شەوە سەختێ فرە وەششا بۍ و نەزاناشا چەنی داشا دەمو ڕۊیەو، ھەرچن ئا شەوۍ تاکو ساحبێ تۆف و زقم و کڕێوەو وەرۋێ دەسشا دا دەسو یۆیەو، بەڵام بە پێوەرە بېیەی و ھامکاری داشا سەر. ساحبێ تەنیا کەرەشێڵێو واناش ھینوو یانەو لالۊ ڕۊسەمی بێ، تەنیا حەیوانێو باڕناش حەیوانوو یانەو لالۊ ڕۊسەمی بۍ، تەنیا دووکەڵېو دیار بێ، دووکەڵوو ھارگاو یانەو لالۊ ڕۊسەمی و دێدە فانۆزێ بێ، تەنیا ھەڵمەو سۆبەو یانەو ئاڎیشا بەرزە بیێبێوە، دیارا تەنیا یانېو سەرو پایەو مەنەبۍ یانەو پیای ژیری بێ!
لالۊ ڕۊسەم لوا بەرەو چەمېوش خشنا دەر و دۆڵیەرە، دیش گرد یاگێوە چەرمەن و دەگا چېروو وەرۋێنە شاریانەو، نیشانېش کەشو پاڵپەشتیشا بۍ چېروو ئا وەروێنە بیەبێ ھېڵېوی ساف. فرە خەمش وارد پەی عەشرەتەکەیش، بەڵام چار ناچار بۍ و دەس بێ‌دەسەڵات، ئاڎ ئانە کە ئەشېیای کەردایش، کەردش و بە گردو دەگای ھۆشتارش دابێ.
بەڵۍ لالۊ ڕۊسەم بە ژیری وېش دیا پەی ئاسمانی زاناش ئېشەو زەمین و ئاسمان جۆتێ با، مشیۊ ھۆشوو کۆچ و کڵفەتەکەیش بۊش و حەیوانەکەش سەردایێ ڕەق نەبۊوە، بەڵۍ قسێ قسێ ئاڎی بۍ و تەگبیرش درۆس. بەڵۍ بڕېو جارێ پەی گېیان بەرکەردەی مشیۊ پا بنیەی دڵتەرەو جە چېوێوی ھەرچن بەنەرخی ویەری.
دیارا زارۆڵەکێچش زەرەرشا نەکەردو گرد گېیانشا چا شەوە سەختێنە بەرکەرد. بەڵۍ ئازیزا مشیۊ وریا و ژیرێ بیمێ و ئەر ژەنېوە یا پیایوی ژیر مژناسمێ مووچیاریەکاش خاس بژنەومێ و تاکو ئا یاگێ پەنەما کریۆ پەنەشا ڕەفت بکەرمۍ.
ماریا عەزیزی.[1]