یاڎو قەڎییمیا
بەشۍ: یەکەمە
ساڵەش توشە بوو، هەر پسەو یاگەکاتەری گرانیچ ڕوەکەرو هۆرامانی، مام مصطفی کە پەنەش ماچا (مچە عالیە) خوڎای گۆرە عەفوەش کەرو، ئاوەختە هەرزەکار بۊ، پېیێوی ئازاو چەمنەتەرس بۍ. کەم قسی کەرۍ، قیافیوی بەرزو دەمو چەمیوی مەیلەو تووڕەش بۍ، خەڵکی کە تەماشەش کەرۍ ئەجېش تووڕەی تووڕەن، بەڵام کە قسیچ کەرۍ فرە پېیێوی متەوازوح و قسەوەش بۍ. هەرزەکار بۊ چەنی کاک جافری ئەژناسیا بە (جافرو ئەحلەی) بەڵخەوە جمارە کاروان پەی گەرمیانی، سەفەرو ئاوەختیچە دیارا بە وەڵاخ بېیەن ، ئیدەگاو ئۆدەگاو ئا گەرمیانیە کەرا نزیکەو چل شەویویشا پۆمشو. جە هیلاکیو دورەدەسی و بی تفاقی و بیکەسی، کاریوشا پەنەمێ ئیتر بەتەمامی ویری گرچیوو هۆرامانی کەراوە. گرچیوشا گنۊوە ویر، هەر جە ئاوی چیێو، میوەی فینکو وەشیۆ، هەوای فینکی، سەیەو باخا تاکو دەمەتەقۍ چایخانەی و فرە چیوایتەری ، زیاتەربا هۆکاری کەڵکەڵەکەردەیشا پەی هۆرامانی . سەرەتا نەئیشنو فرە پەکەشابۊ.
ڕوێوشا، گەرماو نیمەڕو گەرمیانی، بنەو درەختیویەنە بەرو ئاواییویۊ نیشارە و فرە ئاوراشا بۊ، لالو جافر ماچو مسەفا چی مەلی چا یانەنە کچێو دۊ باری با بوەرمۍ پی نانەیماوە! کاک مسەفا بە حکمو ئانەیە بە ساڵە جە لالو جافری وردیتەربوو بە گوشش کەرۊ، ملۊ تەقەهورزنو یانەو کابرای. ژەنێوەی پوشینبەسەرە و چەناکەش بەخاڵی وردی کویا مزیورە، کاک مسەفایچ ماچو پورێ گېیان کەمێک دۆتان نیە بیخۆین بەو نانەمانەوە؟ ژەنەکیچ بەپاو عورفو عادەتو کۊمەڵگای کە گوشەکریێنە پانەیە کە مشیوم میمان ڕیزش گیریو، ئازایانە مێوە دەسۍ و ملو کاسی و دوەتشەشا پەی مارۊ. کاک مسەفا دوەی بەرۊۋە بنەو سەیەو درەختەکەی و چەنی لالۊ حەمە جافری نیشارە دەسکەرا نانو دو واردەی. لالو حەمەجافر کاسە دوەکەی منیو سەرەشۆ بازیوش چەنە هورقوڕنو و دەسی و مارو سمیڵەکاشەرەو ماچو ئاااااااای بخوا وەش بۍ، ئەجۊ دوەکەو مەتییما، کاک مسەفایچ مەکەرو نامەردی ماچو بوەرە! کوام قەبرەش ئەر ئڼە وەشبیەبۊ.
هۆرامان عەبدولڕەحمان.[1]