=KTML_Bold=متمانە=KTML_End=
قتویەکی چکۆلە وەزەنیم هێنا و هەر لەسەر جێگەی نووستنەکەمان دەست و پەنجەیم پێ چەور کرد. هەندێ شوێنی دەستی، بەتایبەت بەینی پەنجەکانی هێندە قڵیشاویەکەی زۆربوو هەستم بە ئازار دەکرد تیایدا، بەڵام وەک کاری هەمیشەیی خۆی، ئازاری خۆیشی لێ دەشاردمەوە.
چونکە لە رۆحەوە هەستم پێکردبوو کە نەیدەویست بە هیچ شێوەیەک خەفەت بخۆم.
مێخەک گیان دەزانیت باش گیرۆدە بوویت.
بە چیەوە؟
بەوەی هەموو شەوێک ئەم مەڵهەمی دەست و پێ قڵیشاندنە، واتە وەزەنی دێنیت و دەست و پەنجەی من دەشێلیت و مەڵهەمکاریم دەکەیت.
کوڕی باش خۆ تۆ دەڵێیت نامەوێ ئازارت بدەم!
ویستم بڵێم ئازاری چیم داویت؟
دەستێکی خستە سەر دەمم و دەمی خستە نێو دەست و پلە قڵیشاوەکانمەوە و ماچێکی توندی کرد و وتی:
لە دەوری یەک بە یەکی تاڵە مووەکانی سەرت گەڕێم، تا دەگات بە یەک بە یەکی پەنجەکانی قاچت. ئیتر هیچ مەڵێ، وەرە باوەشم و با بخەوین.
ئەم دڵنیاییە زۆری نەخایاند...
لە کۆگایەکی گەورەی ئارد داگرتن و بارکرتندا ئیشی دەکرد. کاتی ئیشکردنەکەی لە کاتژمێر شەشی ئێوارەوە بۆ کاتژمێر دووی شەو دەستی پێدەکرد. لەو کۆگایە ئاردی باردەکرد و دایدەگرت. چاوەڕوانی هاتنەوەی و نەگەڕانەوەی لە کاتی خۆیدا نەک هەر هەراسان و بێتاقەتی کردبووم، بەڵکو دڕدۆنگی و دڵپیسیشی تیا سەوز کردم. بە خۆمم دەوت؛ باشە وەختی ئیشکردنی ئەو لە کاتژمێر شەشی ئێوارەوە بۆ دووی شەوە، بە چارەکێکیش دەگاتەوە ماڵەوە چونکە کۆگاکە زۆر دوور نەبوو لەو ماڵەی کە گرتبومان بە کرێ.
بە هەموو حسابێک دەبێت سەعات دوو و نیو بگاتە ماڵەوە، کەچی هەموو شەوێ کاتژمێر شەشی بەیانی دەهاتەوە و لە دەرگای دەدا. مەراقی درەنگهاتنەوەی تا دەهات لە ناوەوە زیاتر ئاگری تێبەردەدام. هەرچەندم دەکرد دڵم نەدەهات پێی بڵێم، ئەوەندە شیرین بوو لە دڵما نەمدەزانی چۆن پێی بڵێم. کە بۆم دەڕوانی ئەوەندە هیلاک و ماندو مردوو بوو لەتاو ئارد، تەنیا کونی چاوی بەدەرەوە بوو.
خەریکبوو مێشکم دەتەقی و تێنەدەگەشتم بۆچی هەموو شەوێک ئاوا دوادەکەوێت و درەنگ دێتەوە...؟ وەک هەمیشە رۆژانی هەینی پشوو بوو، نەدەچوو بۆ کۆگا. بەیانیەکی هەینی دوای نانخواردن، هەستام و بە بیانووی هەندێ کڕینی پێداویستی ماڵەوە چووم بۆ بازار. هەر چەندە وتی با منیش بێم لەگەڵت، پێموت؛ تەنیا هەینی پشووت هەیە لە ماڵەوە بە، تێر ئیسراحەت بکە، منیش زوو دێمەوە.
ڕاستە و راست چووم بۆ محەلی خاوەن کارەکەی:
سەلام و علیکم میرزا فەرەج.
عەلەیکی سەلام مێخەک خان، یاخوا بەخێربێیت نەختێ دانیشە.
سەلامەت بیت میرزا گیان، ئەوەی راستی بێت هاتووم بۆ تەنیا پرسیارێک.
فەرموو.
قارەمانی هاوسەرم هەر لەلای جەنابت ئیش دەکات، وایە؟
بەڵێ، بۆ؟
کاتی ئیشکردنی لە کەیەوە بۆ کەیە؟
لە شەشی ئێوارەوە بۆ دووی شەو.
کەی لە کۆگاکە دەستهەڵدەگرێت؟
دەی بوێت بۆ دوو دەست هەڵدەگرێت و کاتژمێر دوو لە کۆگاکە دەردەچێت.
بە دەموچاوی میرزاوە دیاربوو کە دەیویست بڵێت؛ ئەم هاتنەت بۆ ئێرە و ئەم پرسیارانەت بۆ؟
بەڵام دەرفەتم نەدا هیچ یەکێک لەو پرسیارانە بکات. زوو ئیزنم خواست و لە دوکانەکەی میرزا هاتمە دەرەوە و خواحافیزیم کرد. ئیدی گومان و دڕدۆنگیەکانم چوونە قۆناغی دڵپیسی و مەراقێکی زۆر دڵی قورس کردم و ئارەقێکی ساردم دەردا.
بەخێربێیتەوە رۆحی رەوانم، زۆر زۆر چاوەڕێم کردیت و زۆریشت پێچوو.
سیما و دەموچاوی خۆمم کەمێ لێشاردەوە، چونکە نەمدەزانی چی پێ بڵێم.
بە قەدەر هەموو دنیا خۆشمدەویست، بەو هەموو دڵپیسی و ئازارەوە کە بۆمی دروست کردبوو، هێشتا نەمدەویست دڵی بڕەنجێنم. وەڵامم نەدایەوە و خۆم کرد بە ژووری نوستنەکەماندا.
مێخەک گیان.
-(نەمهێشت تەواوی کات) سەرئێشەیەکی زۆر قورسم گرتووە، پێویستم بە پشووە. ئەگەر لێم بگەڕێیت حەز دەکەم بە تەنیا بم، بەڵکو سەرئێشەکەم تۆزێک بسرەوێ.
بۆ نانی ئێوارە چووم خەبەری بکەمەوە، نان و خواردنم هەمووی حازر کرد:
مێخەک گیان هەڵناسی پێکەوە نانێک بخۆین؟ وا ئێوارەیە و وردە وردە من دەبێت بڕۆم بۆ ئیش.
قارەمان گیان نانی خۆت بخۆ، من هیچ ئیشتیهای نانخواردنم نییە، ئەگەر رۆشتیت، خۆحافیزت بێت.
ئیتر لە ژێر بەتانیەکەوە، ئاگام لە هەموو جوڵە و دەنگێکی بوو، بەم مەراقە گەورەیەوە، کە وەک کێو لەسەر دڵم نیشتبوو لە ژێر بەتانیەکەوە هەر گینگڵم دەدا و هەر خۆم دەخواردەوە. یەک کەس نەبوو لەو دنیایەدا لە قارەمان شیرینتر و خۆشەویستتر بێت لەلام تا بتوانم ئەم ئازارە گەورەیەی بۆ باس بکەم. ئازارێک کە قارەمان بۆی دروستکردبوم.
بە هەست و خوست ئاگام لێی بوو کە نانی خوارد و هاتە دەم دەرگای ژووری نوستنەکە و وتی:
خواحافیز مێخەکەکەی دنیا و ژینم.
لە ژێر بەتانیەکەوە گوێم لێبوو بەڵام جوابم نەدایەوە بۆ ئەوەی وابزانێت نوستووم و ئاگام لەو نیە. ئەو رۆشت و گوێم لە داخستنی دەرگای حەوشەکەش بوو. بەتانیەکەم لە خۆم کردەوە و هاتمە ژووری میوانەکە. وەک چۆن کارێزێک دوای هەزار ساڵ دەتەقێتەوە، ئاوا کارێزی بورکانی مەراق لە سینە و هەناومدا تەقیەوە و بە دەنگێکی بەرز و ترسناک دامە هاڕەی گریان. وەها بانگم لێ هەڵدا وەک ئەوەی ئەوەتەی هەم، رێگەی گریانم لێ گیرابێ. بەدەم زەلزەلەی گریانەوە دەموت:
خوایە گیان بۆچی دەم و دڵ و چاو و رۆح و مێشکت بەستووم و ناتوانم بە قارەمان بڵێم؛ تۆ سەعات دووی شەو تەواو دەبیت، بۆ شەشی بەیانی دێیتە ماڵەوە؟ خوایە بۆ ناتوانم ئەم پرسیارەی لێبکەم؟
دوای ئەوەی چوومە لای میرزا فەرەج و بە تەواوی بۆم روون بوەوە کە سەعات دووی شەو لە ئیش تەواو دەبێت و دێتە دەرەوە، ئیتر دڵپیسیەکەم خەریکبوو پێی هەڵدەگرت بەرەو رق، بۆیە بڕیارمدا ئەمشەو ئەم بەڵا گەورەیە یەکلایی بکەمەوە.
خەریکبوو سەعات دەبوو بە دەی شەو، لە خوا دەپاڕامەوە قارەمان لە دەرگا بدات و ئەم گرێکوێرەیە بکرێتەوە. ئاخر دەزانن چەن سەخت و ماڵوێرانییە بکەویتە چاودێری و بەدواداچوون لەسەر کەسێک، کە لە هەموو کەسێکی ئەو دنیایەت خۆشتردەوێت. دەزانن لەوانەیە ئەم چاودێریە بە لەدەستدانی ئەو کەسە کۆتایی بێت؟!
دەی خوایە گیان با ئەمشەو لە کاتی خۆیدا بێتەوە و ئاوێک بکە بەم ئاگرەدا، ئاگرێک تا ئێستا هەر لە دڵمایە، بەڵام زۆر نزیکە ئەم ئاگرە قارەمانەکەم بسوتێنێت و بۆ هەمیشە بە دەستبەتاڵی بمێنمەوە لە دنیادا. سەعات دوو لایدا و بوو بە سێی شەو، وەک مەنجەڵێکی پڕ لە ئاوی سەر ئاگرێکی زۆر بەتاو هەر دەکوڵام.
کاتژمێر بوو بە پێنجی بەیانی، هەر دەکوڵام تا وایلێهات مەنجەڵ تەڕاییبڕ بوو، دەستیکرد بە خۆسوتان، چونکە ئاوی سەبر و چاوەڕوانی منی لێبڕا.
دەنگی اللە اکبر'ی بانگی بەیانی رایچلەکاندم. بە ترسێکی زۆرەوە هەڵسامە سەرپێ. روو بە دەرگای حەوشە رۆشتم و بە خۆمم وت :
ئێستە دەڕۆم، کێ دەڵێ میرزا فەرەج درۆ ناکات؟ کێ دەڵێ ئیشی زیادەی پێناکات و لە کۆگای ئاردەکەدا نایهێڵێتەوە و نایڕەتێنێ؟
بەم ترس و داڵغە و ختورانەوە نزیک بوومەوە لە دەرگای حەوشە. نازانم دەنگی بانگەکە بوو زیادی کرد یان دەنگی دڵەکوتێی دڵم؟...
دەرگای حەوشەکەم کردەوە، خەریکبوو زیڕەی مەرگ بکەم. قارەمانم بینی لە بن دیواری حەوشەکەدا و لە پاڵ دەرگاکەدا، کوڕەڵەی کردبوو، خەوی لێکەوتبوو، سەرتاپای گیانی نوقمی ئارد بوو بوو. بەردەرگاکە قنچکە جگەرەی زۆری لێکەوتبوو. سۆلسۆلەی تروسکایی قنچکە جگەرەیەکیان مابوو، ئەوەش نیشانە بوو بۆ ئەوەی؛ دەمێک نابێ ئەخیر جگەرەی کێشاوە. مەلا بانگەکەی تەواوکرد، ئیتر دەنگی پرخەی قارەمان باشتر دەهاتە گوێم.
هەموو گیانم نیشتبووە سەر ئاو و ئارەقێکی سەیر، هەستێکی سەیرم تیا دروستبوو، نەمدەزانی قارەمانم خۆشدەوێ یان رقم لێیەتی، ئەمە راستییە یان درۆیە. نەمدەزانی ئەم هەستەی من هەمە باشە یان خراپ؟ من راست دەکەم یان قارەمان؟ راست و درۆ حەقیقەتن یان ئێمە وەک حەقیقەت مامەڵەیان لەگەڵ دەکەین.
بەپێوە وەستابوم، وەک بی ناو ئاو دەلەرزیم، لە قارەمانم دەڕوانی کە نوستبوو، بۆ یەکەمجاربوو نە هەستم بە باشە دەکرد، نە هەستم بە خراپە دەکرد. هەموو گیانم بووبوو بە هەست لە دەرەوەی باشە و خراپە. بە هێواشی کەوتمە سەر ئەژنۆ، بە هێواشی سەری قارەمانم بەرزکردەوە و روو بە کۆشم بردم. پێڵاوە ئارداویەکانی کردبوو بە سەرین، لەگەڵ دەستم بۆ برد خەبەری بوەوە. داچڵەکی و وتی:
ئەوە چیەکەی لێرە مێخەک گیان؟
سەرم شۆڕ کردەوە بەسەریدا و بەدەم گریانێکی سارد وەک ساردی ئەو بەرەبەیانە، بە هێواشی وتم؛ هەستە با بچینە ژورەوە.
لەو شەوەوەی کە دەبوو سەعات دوو بۆ دوو و چارەک بگەمە ماڵەوە و نەگەشتم، لەو شەوەوە سات بە سات هەستم بە نیگەرانی و دڕدۆنگی و دڵتەنگی و پەرێشانی و دڵپیسیەکانی تۆ دەکرد، ئەوەشم دەزانی ئەوەندە خۆشتدەوێم، دڵت نەدەهات هیچم پێبڵێیت. هەموو شەوێ لە کاتی خۆیدا کارم تەواو بووە و هاتومەتەوە ماڵەوە، بەڵام بۆ ئەوەی خەو لە تۆ نەزڕێت و هەڵنەسیت و بەدەم منەوە ماندوو نەبیت، هەموو شەوێ تا خەو زۆری بۆ هێناوم خەریکی جگەرەکێشان بووم و دواتر هەر لەم بەردەرگایەدا نوستووم. تا بەرەبەیان نوستووم لەم بەردەرگایەدا بۆ ئەوەی خەوت نەزڕێت و هەراسان نەبیت بەدەستمەوە. تەقەم نەداوە لە دەرگا و لە بەردەرگاوە لێی نوستووم.
لەوە زیاترم بۆ مەگێڕەرەوە، چونکە ئەم هەموو گەورەییەی تۆ نە لەنێو خۆمدا و نە لەم دنیایەدا بۆم جێنابێتەوە.
ئیتر نەمهێشت خۆی بگۆڕێت، هەر بە جلە ئارداویەکانیەوە، چومە باوەشی و پێم وت:
توخوا ئیتر هیچ مەڵێ، تا تێر دەبم لێت. با لە باوەشتا بم و تێر تێر بۆنی خۆت و جلە ئارداویەکانت بکەم، بەڵکو تۆزێک نووری جوانی تۆم بەربکەوێت. [1]
نوسینی: #عەلی پێنجوێنی#
=KTML_Bold=تێبینی: ئەم بابەتە بە ڕێنووسی سەرچاوەی ئاماژە پێکراو نووسراوە، کوردیپێدیا هیچ دەستکارییەکی نەکردووە!=KTML_End=