حەیا بارشکەرد
ژیوای ئۆسای، یام جارا فرە جیاوازبۍ چەنی ئیسەی، جارا پېوەڼییە کۊمەڵییەکۍ فراوانۍ و دۊڵەمەڼۍ بېنۍ، گۆرەیی و گولانەیی بۍ، دلۍ خانەوادێنە گۆرەکۍ، ئەڎا و تاتە، ماما و بابا قەڎرێ فرەشان بۍ، هیچ کەسێ چېرو فەرمانی و قسېشانە بەرنەشۍ، کوڕ و کناچېشا ڕوەشان نەبۍ وەراوەرشاوە بڕێ ڕەفتارۍ غەریبۍ بکەران، بەڵام ئیسە گردچېو فاڕیان، گۆرە و گولانەی نەمەنەن، جۊرێ جە ئازادی بەرقەرارەن هەکە خەریکەن سنوور مەبەزیۊن. زارۊڵۍ بە گۊشی ئەڎا و تاتەیشان نمەکەران، پۊشاکی ناشەرعی و ناعادەتی مەپۊشان، هیچ شەرم جە ڕیش چەرماو کەسە نزیکەکاشان نمەکەران. وەختێ ئا پیا قەڎییمیۍ ئا دیمەنا مەوینان، خەمبارۍ مەبان، ئاخۍ پەی ژیوای جارانی هۊرکېشان، ئیتر یۊشان ماچۊ: بە خوڎا برا تازە دەسەنە بەرشیەن، حەیا بارشکەرد.[1]