کورد دلۍ چەرخەکا تاریخینە
بەشۍ: سەڎ و چل و ششەمە
نویستەی: #هاوڕێ باخەوان#
ساڵەو (1826ز): چن تۊمارێ پېوەس پی ساڵېوە ئینێ وەردەسەنە:
* ئەچی ساڵېنە ژمارەو سەربازا پاڎشاو کۆرەی میرنشینو سۆرانی یاوان پاڼزە هەزار سەربازۍ.
* ئەچی ساڵېنە مسەفا بەگ تاتەو پاڎشاو کۆرەی میرنشینو سۆرانی کۊچی دمایینش کەردەن.
* میانو جەنگو فارس و ڕووسینە، ڕووسەکۍ کتېبو پیروزو شەرەفنامەیشان دلۍ کتېبیانەو سەفەوینە جە ئەردەبېل فاڕاوە پەی پیتەربورگی.
* وەلی دېوانەی شاعېر، ئەچی ساڵېنە ناوچەو بەکراوای نزیک هەڵەبجەی ئامان دنیاوە.
* خ.د. فرێن، یەکەمین زانای ڕووسەن کە دلۍ یۊ جە ڕۊنامەکا پیتەربورگو ئۆساینە باسو شەرەفنامەیش پېسە سەرچەمێ بە قیمەتی کەردەن.
* ئەچی ساڵېنە مەڵڵا مەهدی شێخولئیسلامی سنە، کە بە ئاغە نامبانگش بەرکەردەن ئامان دنیا.
* ئەچی ساڵېنە، یام ساڵەی دمایینەنە پاڎشاو کۆرەی سەرکۆتەن ملو موحەمەڎ پاڎشاو بابانیرە، دلۍ ناوچەو سورداشی.
* ئەچی ساڵېنە زانای ئایینی مەولانا خالیدی نەقشبەڼی جە دیمەشق کۊچی دمایینش کەردەن.
* م. ڤۆڵکۆڤ، یەکەم کەسەن کە بە درېژی دەربارەو شەرەفنامەی نویستەنش.[1]