پێنج خشتەکی وریا قانع لەسەر شیعری باوکی
ئەی وەتەن! ئەی یادگاری ئەردەلانی تاجدار
ئەی وەتەن! ئەی هێزی ئەژنۆ و مەرهەمی زامی جەخار
چونکە خەم چوار دەوری گرتم دێمە باسی چوار چوار
چوار شتن ئەمڕۆکە بوونە نەگبەتی کوردی هەژار
جەهل یەک، دڵپیسی دوو، بێ عەقڵی سێ، داوا چوار
بۆ کزی و پاشکەوتنت وا دێمە سەر گریان و ڕۆ
با کەسیش هاودەم نەبێ، شیوەن ئەکەم هەر خۆبەخۆ
گوێ کرە ئەی نیشتمان، دا پێت بڵێم بۆ پەستی تۆ
مەنعی پێشکەوتن ئەکەن لەم خاکمانە چوار گرۆ
خان یەک، سەردار دوو، بەگزادە سێ، ئاغا چوار
باخەوانی باخم و ئەمما لە میوەی بێ بەریم
کەس نییە جەرگی بسووتێ بۆ پەشێوی و سەرکزیم
وا سەرم شێواوە خۆیشم قەت بە خۆم نازانم چیم
نایەڵن بۆخۆم ڕەحەت بم، سەربەخۆ تاوێ بژیم
ئەجنەبی یەک، مامە دوو، ئەقتاعی سێ، کوێخا چوار
بێ لەگەڵما قوڕ بپێوی ئەو کەسەی هاوفەردمە
هاو خەیاڵ و هاو نموونەی، ئاﮪ و ڕەنگی زەردمە
شێت و سەرسامم لە داخا وا کە هەردە و هەردمە
من لە داخی سەرکزی ئەم میللەتە چوار دەردمە
سیل یەک، مالاری دوو، کوێری سێ، ئیسقا چوار
دەردەکەم دەردی گرانە، کەس نەزانە و کەس نەناس
تاوێ وێڵی سەر چیام و تاوێ شێت و تاوێ کاس
باوەڕم پێ کە بەوەڵڵا بێ درۆ و بێ باس و خواس
یادگاری ڕەنجی پەنجەی کوردەکانە چوار ئەساس
قەسر یەک، ئاراس دوو، شامات سێ، بەغدا چوار
بۆ نەناڵێ دڵ لە داغا، بۆ نەسووتێ وەک کەباب؟!
شۆری گریان و هەنسکم وا لەجێی چنگ و ڕوباب
قوم بە قوم زوخاوی جەرگم، خۆم ئەنۆشم وەک شەراب
باز بووم باڵی شکانم چوار بەڵای نەحسی خراب
خانەقا یەک، تەکیە دوو، عەممامە سێ، عابا چوار
دوێ لە ڕێدا، ئاﮪ و ناڵەی دڵبرینێ هاتە گوێم
سەیر ئەکەم باوکی ئەزیزم، وردە وردە هاتە ڕێم
پێی وتم نازانی وریا، بۆچی من وا دێم و کێم؟
چوار سفەت مەوجوودە بۆ من، بۆیە هیچ کەس نایەوێم
«قانعی» یەک، شعر دوو، ڕووخۆشی سێ، مەللا چوار
هۆزانەوان: #قانع#
پەرتووک: #چوارباخی پێنجوێن# [1]