کورد دلۍ چەرخەکا تاریخینە
بەشۍ: دوەسەڎ و هەشتا و هەشتەمە
نویستەی: #هاوڕێ باخەوان#
ساڵەو (1920ز.):
بەندەو 62:
کۊمسیۆنو ئەستەمبوڵی جە یەرۍ ئەنداما پېکئامان کە حکومەتەکانو بەریتانیا و فەڕەنسا و ئیتالیا بە ڕەسمی دەسنیشانېشان مەکەران، تاکو شش مانگۍ دماو مۊرکەرڎەو ئا پێمانەیە ئا کۊمسیۆنە نەخشێوە پەی خودموختاری ئۆتۆنۆمی دلېنەیی، ئا مەڵبەندا پېشکەش کەرۊن، کە فرەو نیشتەجایاشان کوردېنۍ و کۆتېنۍ وەرکۆتو ڕۊخانەو فوراتی و پانیشتو ئەرمەنستانی، کە کریۊ چېولای سنوورشان پەی دیاری بکریۊن، یام کۆتېنۍ سەرنیشتو سنوورو میانو تورکیا و سوریا و میزوپۆتامیای، پېسە بڕگەکانو ویس و حۆت و دۋۍ و یەرۍ ئامان، گەر کۊمسیۆنەکە سەرو مەسەلێوە نەتاواش قەرارێ یۊگیر بەرکەرۊن، ئانە هەرکام جە ئەندامەکا کۊمسیۆنی مەسەلەکۍ چەنی حکومەتەکەو وېش باسکەرۊن. ئا بەرنامە پارېزگاری تەمام جە ئاسورییەکا و کەمەنەتەوەییەکا و ڕەگەزییەکا تەری چا مەڵبەڼەنە مسۊگەر کەرۊن، پەی بەدیئامای ئا مەرامەیە کۊمسیۆنێ جە کیانیاو بەریتانیا و فەڕەنسا و ئیتالیا و ئێران و کوردەکا پەی ۋشکنای و قەراردای سەرو هەر نۊعە دەسکاریێ کە بەپاو شەرتەکا پێمانو سنووری میانو تورکیا و ئێرانی، سەرو سنوورو تورکیای ئیمکانش بۊن، سەرو ئا مەڵبەندا مڎۊن.
بەندەو63:
حکومەتو تورکیای هەر جە ئیسۆ مەشۊم گرڎو قەرارەکا ئا دوە کۊمسیۆنەیە کە جە بەندەو 62 باسکریێنۍ قبووڵ بکەرۊن و پەی ماوەو یەرۍ مانگا مەشۊم جابەجاشا بکەرۊن.
بەندەو 64:
گەر تاکو ساڵێ دماو ئیمزاکەرڎەی ئی پێمانەیە، کوردەکانو نیشتەجاو ئا مەڵبەندەیە کە جە بەندەو 62 دیاری کریان، بە ئەنجومەنو کۊمەڵەو گەلاشا یاونا کە فرەو نیشتەجایاو ئا مەڵبەندەیە گەرەکشانەن جە تورکیای جیێباوە و ئەنجومەنیچ دڎانش نېیا پانەیرە کە ئانۍ متاوان سەربەۋۍ بژیوان و ڕاشئەسپارا کە سەربەۋېییشان بڎریۊ پەنە، مەشۊم تورکیا جە ئیسۆ ئا ڕاسپارایا قبووڵ بکەرۊن و چا گرڎو مافا وېشە چا مەڵبەڼەنە دەس هۊرگېرۊن. چەنی بییەو دەسبەرداربییەو تورکیای چا مافا بە درېژی دلۍ پێمانێ دیاریکریاینە باسکریۊن، کە میانو تورکیا و هامپێمانەگۆرەکانە بەسیۊن، کاتێ حکومەتو تورکیای چا مافا دەسش هۊرگېرت، گەر کوردەکۍ ویلایەتو موسڵی بە دڵوازی وېشان گەرەکشان بی بلانە پاڵو ئا حکومەتە کورڎیەیە، هامپێمانە گۆرەکۍ هیچ جۊرە وەرگیریێ نمەکەران.[1]