پیێوە واچۍ
ژەنەکېم ئیجازەش دانێ پەنە کە شۊنۊ چن ساڵارە پەی نانوو وېرەگای و سینەما لوای چەنی ژەنېوەتەرێ بزیۆرە.
ژەنەکېم وات : پیاکە! من وەشم مسیەی وەلێم دڵنیەینا ئی ژەنېچە تۊش گەرەکنی و حەزکەرۊ چەنیت گېڵۆ.
ئاخانمێ کە ژەنەکېم گەرەکش بې چەنیش بلوو بەر ئەڎام بې، ئەڎام (18) ساڵې بې شۊنۊ مەرڎەی تاتەیمرە تەنیەی بې، وەلێم دەردی سەرا ژیوای و کڵفەتباری ناسەبێ سەرەمڕ سەرش دەو وەنە، تەنیا بەین بەینێ سەرو پایەیۆ هەواڵېۋەش پەرسېنێ، هەر ئاشەوە کە ژەنەکېم وات تەلەفوونم کەرڎە پەی هەتا واچووش پەنە: پەی نانوو وېرەگای و سینەما لوای بلمێ بەر، ئەڎام بە پەشۆکیاییەو پەرساش : چېش بېیەن؟ ئەڎام تەلەفوونېوە شەوېنە و یام خوڵکێوە کت و پڕیە لاشەو ناوەش هەواڵێ بې، واتم ئەڎا گېیان! وەرو وېمرە ویرێم کەرڎې ئەر ئۍ شەو پێوەرە بیمێ وەشارې، ئەڎایچم کوچالەی ماتش کەرد و واتش: گېیانوو ئەڎالې منیچ حەز کەروو،
عانێ لوانێ شۆنەش دیم جلەکې ئاخرەمین جەژنەو زەماوەنڼیش ئینەی پۊرەو چەمەڕەیمەنە و بە خوەیەو پېسەو مەلایەکا ئاما پێوایمەو، عانێ سواروو ماشینەکەی بېیە واتش: واتم بە ڕەفێقەکام ئۍ شەو چەنی کوڕەکەیم ملای ملمێ گېڵای، ئاڎیچێ فرە پەنەشا وەش بې، لوەیمێ ڕەستوورانێوە بې قرم وقاڵ، پاسە دەسش گېرتە بېنې هەر ئەجۊش مەلەکەو سەرزەمینینە، دماو ئانەیە نیشتێمېرە دەسم کەرد بە وەنایەو سوورەتەو واردەمەنیەکا ڕەستوورانی، عانێ سوورەتەکې وەنێناوە بەلاچەم دیانې پەی ئەڎایم دیم بە خوەیوە تەماشەم کەرۊ و واتاش پەنە: تۊ زاڕۆڵە بېنی پێوەرە ئێنمێ پەی ڕەستوورانی، من سوورەتەو واردەمەنیەکا وەنێنێوە،
منیچ واتم: ئەڎا گېیان! ئیسە مشیۊ تۊ ئیسراحەت کەری و دەسور فەرماوی من خزمەتکارت بوو، شۊنۊ نان واردەیرە ئاڼە کەوتیمێ قسێرە کە نەیاوەیمێ سینەمارە.
عانێ بردەمەو یانە واتش: دیسان حەزکەروو پێوەرە بزیەیمېرە وەلێم پاشەرتێ من حەسابش کەرۊ، منیچ واتم سەرو چەمام، عانێ ئامانیەو یانە ژەنەکېم وات: وەش وېیەرد؟ واتم: هەزارجارێ خانەت ئاوابۆ هەرتەمام وەش بې،
چن ڕوێ دماتەر ئەڎام دڵش جە وەنەدای کەوت و پەی هەمیشەی جیاش ئاستیمێ.
چن ڕوېش پەنەشی پاکەتێوە چا ڕەستوورانەو کە ئاشەوە چەنی ئەڎایم نانما واردەبێ یاوا دەسم، عانێ پاکەتەکەم کەرڎەو دیم نامە و ڕەسیڎېوەش چەنەن، نامەکەنە نویسیا بې: نمەزانۇو مەنوو یام نە، وەلێم زەڕوو دوې دەسا واردەمەنیم دان، دەسێش پەی وېتوو ئەو دەسەکەش پەی خانمێت.
مەرەجیۆم بزانی ئاشەوە کە چەنی تۊ بېنې چن وەشم بې؟
ئەچا وەنەم حاڵی بی بە کاتو وېش واچمێ بە ئازیزاما وەشێما مسیا و حەزکەرمې هەرچەنیشا بیمێ.
هیچ چېوێ ژیواینە هەمیتدارتەر جە کەس وکاری و ئازیزا نیارێ.
هەرئارۊخاسەن هەی هووتا سەوای
کێ زانۆ چېشەن ئێراڎەو خوڎای.[1]