قەبرەو دەروېشی، هېمای فەرهەنگی شارەکەیما
نویستەی: #ڕەئوف مەحموودپوور#
دەروېش، زرێبارە، ئوستوورەو زرێبارێ و... بەشېوە دێرین و بناغەداروو فەرهەنگی خۆماڵی خەڵکو ئی مەحاڵیەنێ و بەجۊریێ دلې دڵ و زەینەو خەڵکی و تارێخی جەماوەریەنە ڕیشەشا پێکان، لابەردەی و سڕیەیشاوە مەحاڵەن و بییێنێ پېسەو بەشێوە جە هېما فەرهەنگیەکاو مەریوانی و کوردەواریی.
پارېزنای و سەرنج پەنەدایشا جەلاو وەرپەرساوە، هەنگامێوە ئەرېنیە و پەنەوازەنە. بەتاییبە لاو بەشە فەرهەنگیەکاوە و شوراو شاری و شارەداری و میراس‌فەرهەنگیەوە.
پاجۊرە دیارەن، ئیسە وەشکەرڎەی و بەرفراوان کەرڎەی جادەی خەریکا پاڵو قەبرەو دەروېشیەنە کارش سەرکریۆ.
دەسبەردەی پەی هەرمانێ ئاوەڎانکەرەوێ و عومرانیێ هەرمانێوە عالەنە و نیازش بە دەسوەشانە واتەی هەن. بەڵام نیازا پاڵو ئانەیەنە و تەنانەت زېیاتەر چانەیچ سەرنجە بە هېما فەرهەنگیەکا دریۆ. ئەچی ڕاستانە لازما و داواکارنا نەک تەنیا دەوروبەرو قەبرەو دەروېشی تەنگەلانە و وەرتەسکە نەکریۊوە، بەڵکوو پېسەو هېمایێوە ئەوەمەنێ، کریۆ بە سەوزەڵان و پارکێوە ئاوەڎان. هەرپاجۊرە قەبرەو باباتاهېری جە هەمەڎانەنە پەیش کریان و بېیەن باعیسوو دڵوەشی خەڵکی.
پېسەو ئەرکێوە فەرهەنگی و شارۆمەندی، داوا کەروو ناوەندە فەرهەنگیەکې شاری پیبۊنۆ بەیاوە دەنگ و پەی ئاوەڎان کەرڎەیۆ و بە سەوزەڵان کەرڎەی دەوروبەرو قەبرەو دەروېشی هەرمانە کەرا. بەدڵنیاییەوە پاڵو پانوپۆڕ کەرڎەی جادەکەیەنە، ئی هەرمانێچە دڵوەشکەرە و پەی وەرپرساو ئیسەو شاری بۊ بە شانازی.[1]