فەرهاد پیرباڵ
باسی ڕۆمانەکە ژیانی ڕۆژانە و پڕ کێشمەکێشی نوسەرە ئەو کاتەی لە فەڕەنسا بوە، دوو کارەکتەری سەرەکی ڕۆمانەکەی کە بریتین لە (محەمەدی حاجی زادە و مسیۆ لووسیانا)
-محەمەدی حاجی زادە مەلایەکی شیعەی ئێرانە بەهۆی ڕاجیاوازەکانی لەگەڵ ڕژێمی ئەوکاتی ئێران خەڵعی لیباس کراوە و لە مەلایەتی دور خراوەتەوە، بەو هۆیەوە ئێرانی جێ هێشتوەو ئاوارەی فەڕەنسا بوە لەگەڵ فەرهادا بەڕێکەوت ئەبنە هاوڕێ، ژیانی پڕمەینەتی ئەوروپا وا لەمەلایەکی ئێرانی ئەکا لەگەڵ ژنێکی کۆمەنیست دەست تێکەڵ بکات !! هەروەها ببێ بە (homosexual) هاوڕەگەز خواز.
فەرهاد لەڕێگای هاوڕێیەکی مەلاوە ئەتوانێ تابلۆکانی خۆی لە سانفرانسیسکۆ بفرۆشێ.
مسیۆ لووسیانا جولەکەیەکی ملیاردێری بەڕەگەز (ئیسپانی یا پورتوگالی)یە و خاوەنەی ئەو هۆتێلەیە کە فەرهاد کاری تێدادەکات لەگەڵ فەرهادا ئەبنە دوو هاوڕێی نزیکی یەکتر.
محەمەدی حاجی زادەو مستەر لووسیانا بەتەواوی لەیەک ئەچن لە ڕووخساردا و ئەستەمە جوودا کردنەوەیان لەیەک ئەم دوانە بەهۆی فەرهادەوە بەیەکتر ئاشنا ئەبن، مستەر لووسیانا دەی هەوێ سەردانی ئێران بکات بۆئەوەی سەر لەخۆشەویستەکەی بدات و هەندێک بەڵگەنامەی با پیرانیش لە ئێران بگەڕێنێتەوە بەڵام ناتوانێ بە ناسنامەی خۆی سەفەر بکات سەرەنجام ڕووداو گەلێکی سەیرو سەمەرە ڕوو ئەدەن لەبەینی مەلا ئێرانیەکە و مستەر لوسیانایا.، کە نوسەر ناتوانێ جیای بکاتەوە ئاخۆ ئەوەی لای ئەمێنێتەوە مستەر لوسیانایە یا خوود نا وا لە خوێنەریش ئەکا بە مەراقەوە بەدوای وەڵامەکەیدا بگەڕێ
نوسەر لە ڕۆمانەکەیدا باسی نۆستالجیایەکی قوڵی تاکی ڕۆژهەڵاتی دەکات کە مەسەلەیەکی تەواو دەرونی و پەیوەندی لاوازی ویستی ڕۆژهەڵاتیە کە دین دەکەنە بەهانە بۆ ئەو بەیەکەوە بونەو تێکەڵ نەبونە لەگەڵ تاکی ڕۆژ ئاوایی.
نوسەر باسی سیراع و ململانێی نێوان ڕۆئاوایی و ڕۆژهەڵاتیەکان دەکات، ڕۆژئاوایەکان هەمیشە ڕۆژهەڵات بە گۆمی خوێن و شەڕ دواکەوت و ئەزانن، ڕۆژهەڵاتیەکانیش ڕۆژئاوا بە داگیر کەر و خۆسەپێن ئەزانن، نووسەر ئەو تێڕوانینە تێک دەشکێنێ و ئەڵێ هیچکامیان بێ ئەوی تر ناتوانن بژین و هەمیشە پێویستیان بەیەکترە.
لایەنێکی تری باسی ڕۆمانەکە سیراعی و ململانێی نێوان ئیسلام و جولەکەیە کە هەم دیاسان ئەم دوانە بۆ ژین و بەردەوامی پێویستیان بەیەکترە.
فەرهاد لەم ڕۆمانەیدا خۆی لە کلتوری ڕۆمان نوسین لە ناو حەوزی زمانی کوردی بە تەواوی جیا کردۆتەوە، وازی لە فۆڕم و تەکنیک و شێوازی زمان هێناوە کە پێشتر ڕۆمان نوسەکانی کورد بەکاریان هێناوە.
ئەوەی ماوەتەوە بگوترێ لەسەر ئەو ڕۆمانە پڕ چێژ و تایبەتە ئەوەیە کە وەڕگێڕدراوەتە سەر زمانی فارسی بەڵام لە ئێران چاپ و بڵاو کردنەوەی قەدەغەیە، حەتمەن ئەویش بەهۆی مەلا شیعەکەوەیە، هەروەها ڕۆمانەکە وەڕگێڕ دراوەتە سەر زمانی فەڕەنسیش. [1] [2]
دەزگای پەخش: کولتوور، بۆ چالاکی ئەدەبی و فەرهەنگی
زنجیرەی پەڕتووک 21