ڕۆژنیوز، هاوکار مستەفا
بەڕێوبەرایەتی #گەشتوگوزار#ی #هەڵەبجە# ئاشکرایکرد، کە لە چوار ڕۆژی #جەژنی قوربان#-دا 60 هەزار گەشتیار ڕوویان لە سەیرانگاکانی هەڵەبجە و #هەورامان# کردووە و بە بەراورد بە جەژنی ڕەمەزانیش ئامارەکەی بە ڕێژەی %50 زیادییکردووە.
سەردار عەلی، بەرپرسی بەشی گەشتوگوزار لە بەڕێوەبەرایەتی گەشتوگوزاری هەڵەبجە ئاماری هاتنی گەشتیارانی چوار ڕۆژی جەژنی قوربانی بۆ سەیرانگاکانی هەڵەبجە تایبەت بۆ ڕۆژنیوز ئاشکراکرد.
بەپێی ئامارەکە، لە ماوەی چوار ڕۆژی جەژندا زیاتر لە 60 هەزار گەشتیار کە زۆربەیان لە پارێزگاکانی ناوەڕاست و باشووری عێراقەوە هاتبوون ڕوویان لە سەیرانگا و شوێنە گەشتیارییەکانی هەڵەبجە کردووە.
سەردار عەلی، ئاماژەی بە ئاماری هاتنی گەشتیارانی لە جەژنی ڕەمەزان-دا کرد، کە 30 هەزار گەشتیاربووە و بەو پێیەش ڕێژەی هاتنی گەشتیاران %50 زیادییکردووە، وەک خۆشی باسیکرد بە بەراورد بە جەژنی قوربانی ساڵی ڕابردووش ئامارەکە بەرزوبووەتەوە.
ناوبراو، هۆکاری ئەو زیادبوەنەش دەگەڕێنێتەوە بۆ ئەو ئاسانکارییەی کە لە خاڵە سنوریی و بازگەکاندا بۆ گەشتیاران دەکرێت و هەروەها بەرەو نەمان چوونی شەڕی داعش.
بەرپرسی بەشی گەشتوگوزار لەبەڕێوەبەرایەتی گەشتوگوزاری هەڵەبجە ئەوەشی وت: پێشبینی دەکەین تا کۆتایی ئەم هەفتەیە هاتنی گەشتیاران نزیک ببێتەوە لە 70 هەزار گەشتیار و زۆربەی ئەو گەشتیارانەشی کە هاتوونەتە ناوچەکە ڕوویان لە سەیرانگاکانی ئەحمەد ئاوا و سەرچاوەی زەڵم و سەیرانگای ئاوێسەر کردووە ئەوەش بەهۆی لەباری کەشوهەواکەیی و دڵگیری ناوچەکەوەیە.
لە ماستەر پلانی گەشتوزاری هەڵەبجەدا 35 ناوچەی گەشتیاریی هەن، کە هەورامان-یشی تێدایە و ساڵانەش بە هەزاران گەشتیار سەردانی ئەو ناوچانە دەکەن.[1]
06-09-2017