بەناوی خانەوادەو بنەماڵەی خوالێخۆشبوو مامۆستا (#عەلی عەبدوڵڵا#) سوپاس و پێزانینی زۆرمان ئاراستەی جەنابی سەرۆک بارزانی و بەڕێز نێچیرڤان بارزانی و وەزیرەکان حکومەتی هەرێم و سەرۆکایەتی پەرلەمان و پەرلەمانتارانی کوردستان و سکرتێر و ئەندامانی مەکتەبی سیاسی و ئەنجوومەنی سەرکردایەتی و کادیرانی پارتی دیموکراتی کوردستان و تێکڕای سەرکردە و نوێنەری حزب و لایەنە سیاسییەکانی کوردستان و کەسایەتیە ئایینی و کۆمەڵایەتیەکان و ڕۆشنبیر و تێکۆشەر و خەباتکارانی گەلەکەمان دەکەین کە ئەرکیان کێشا لە کاتی نەخۆشکەوتن و بەشداریانکرد لە بەخاکسپاردن و ڕۆژانی پرسەی باوکی ئازیزمان، ڕێزو ڕێزوپێزانینی تایبەتمان بۆ دامودەزگا حکومی و ناحکومیەکان و دامودەزگا ئەمنییەکان و تەواوی چین وتوێژەکانی کۆمەڵگەو هاووڵاتیانی خۆشەویست، سوپاسی گشت خزم ودۆست و هاوڕێ و ئازیزانمان دەکەین، بەڕاستی هاوسۆزیی و دڵنەوایی گشت لایەک لە خەم و پەژارەمانی کەمکردەوە، داواکارین لەخوای گەورە پاداشتی هەموو لایەک بداتەوە و لە دەردوبەڵا و کۆست بەدوور بن.
خوالێخۆشبوو مامۆستا (عەلی عەبدوڵڵا) تەواوی تەمەنی خۆی بۆ خەبات و قوربانیدان تەرخان کرد، هەر لە سەرەتای دامەزراندنی پارتی دیموکراتی کوردستانەوە وەک تێکۆشەرێکی دڵسۆزوخۆراگر، بەدرێژایی ئەو کاروانە هەمیشە مکوڕ و بەردەوامبووە لەسەر کوردایەتی و ڕێبازی بارزانی و پارتایەتی، لە مێژووی بەرزونزمی نەسرەوتن و کۆڵنەدانیدا جێگەوپێگەی دیاروبەرچاو بوو لە خزمەتگەیاندن بەدۆزی ڕەوای گەلەکەمان و بەدیهێنانی ئامانجەکانی، بەشداری بەرفراوان و هاوخەمی هەموو ئەو کەسایەتی و هێز و لایەن و چین و توێژانەی کوردستانیش لەو کۆستەماندا دەرخەری ئەوەبوو کە (عەلی عەبدوڵڵا) بەتەنیا موڵکی بنەماڵەکەی و پارتی نەبوو بەڵکو تێکۆشەر و خەباتکارێکی تەواوی کاروانی ڕزگاریخوازی گەلەکەمان بوو.
مامۆستا(عەلی عەبدوڵڵا) نموونەی خەباتگێڕێکی نەتەوەیی و نەیشتمانپەروەر بوو، هەوڵ و کۆشش و جێپەنجەی دیاربوو لە یەکخستن و یەکگرتنی ڕیزەکانی گەل و لێکنزیک کردنەوەیان بۆ بەدیهاتنی مافی گەلەکەمان و دوورکەوتنەوە لە دووبەرەکی و ناکۆکی ناوخۆیی.
جارێکی دیکە سوپاس و پێزانینمان بۆ گشت لایەک و داواکارین لە خوای گەورە گەلەکەمان لە مەینەتی بەدوور بێت و هەموو لایەک هەر ساغ وسەلامەت بن و گیانی کۆچکردوویش بەبەهەشتی بەرین شاد بێت.
(هەڵمەت و هێرۆ و هەوری)
کوڕ و کچانی مامۆستای کۆچکردوو عەلی عەبدوڵڵا
30-10-2017
Tämä tuote on kirjoitettu (کوردیی ناوەڕاست) kieli, klikkaa kuvaketta
avata kohteen alkukielellä!
ئەم بابەتە بەزمانی (کوردیی ناوەڕاست) نووسراوە، کلیک لە ئایکۆنی
بکە بۆ کردنەوەی بابەتەکە بەو زمانەی کە پێی نووسراوە!
Tämä tuote on katsottu 3,869 kertaa
Kirjoita oma kommenttisi tuote!